8 naýryz – áielder qaýymynyń qoǵamdaǵy ornyn taǵy bir márte eske salatyn erekshe kún. Búginde qazaqstandyq hanymdar ǵylymda da, kásipte de, memlekettik basqarý júiesinde de belsendi. Osy oraida Dalanews.kz redaktsiiasy jaýapty qyzmet atqaryp júrgen bilikti hanymdardyń birqataryna sholý jasady.
Úkimet úmitin arqalaǵan úsh ministr
Qazirgi tańda Úkimet quramynda 21 ministrdiń ishinde úsh áiel ministr qyzmet atqarady.
Aida Balaeva Premer-ministrdiń orynbasary ári Mádeniet jáne aqparat ministri qyzmetinde eldiń ideologiialyq baǵytyna úles qosyp keledi. 2023 jyldyń kúzinde ministrlik tizginin ustaǵan ol, 2025 jyldyń sońynda Úkimet basshysynyń orynbasary deńgeiine deiin kóterildi. Memlekettik qyzmetttiń barlyq satysynan ótken saiasatker buǵan deiin Prezident ákimshiligi men Aqparat ministrliginde jaýapty sheshimder qabyldap, óziniń joǵary kásibiligin dáleldegen. 
Densaýlyq saqtaý ministri Aqmaral Álnazarova – meditsina ǵylymynyń maitalmany ári tájiribeli dáriger. 2024 jyldan bastap ministrlik tizginin qolǵa aldy. Buǵan deiin Senat depýtaty retinde áleýmettik saiasat pen densaýlyq saqtaý máselelerine qatysty bastamalar kótergen.
Oqý-aǵartý ministri Juldyz Súleimenova elimizdiń bilim berý júiesin 2025 jyldan bastap basqaryp keledi. Ol bul laýazymǵa Májilis depýtaty qyzmetinen kelip, jastar saiasaty men bilim salasyndaǵy túitkildi máselelerdi sheshýge bilek sybana kiristi. Urpaq tárbiesi men ustazdar mártebesin kóterý jolyndaǵy aýqymdy jumystar Juldyz hanymnyń tikelei baqylaýynda.
Ákim áielder kimder?
Jergilikti atqarýshy bilikte de áiel ákimderdiń qoltańbasy aiqyn seziledi. Ásirese qala aýdandary men strategiialyq aimaqtarda hanymdardyń basqarý qabileti joǵary baǵalanyp keledi.
Mysaly, Almaty qalasynyń Naýryzbai aýdanyn 2023 jyldan beri Nazira Toǵyzbaeva basqarady. Ol qarqyndy damyp kele jatqan aýmaqtyń infraqurylymyn jaqsartýǵa eleýli úles qosyp júr.
2022 jyly Jetisý aýdanynyń ákimi bolyp taǵaiyndalǵan Lázzat Jylqybaeva da bilim jáne memlekettik qyzmettegi mol tájiribesin aýdannyń áleýmettik ahýalyn kóterýge jumsap keledi.
Óńirlerde de áiel basshylardyń eńbegi eren. Máselen, Almaty oblysy Uiǵyr aýdanyn Bota Eleýsizova, Jambyl oblysy Taraz qalasy Jibek joly aýdanyn Qarlyǵash Aralbekova basqaryp, jergilikti halyqtyń muń-muqtajyn sheshýde belsendilik tanytyp otyr. Soltústik Qazaqstan oblysynyń eki aýdanyn da áiel ákimder basqarady. 2022 beri Aqqaiyń aýdanynda Janar Qusaiyn, al Mamliýt aýdanynda Elena Stepanenko qyzmet atqarady. Aqmola oblysynyń Jaqsy aýdanynda Almagúl Qadyralina, Shyǵys Qazaqstannyń Zaisan aýdanynda Aelita Ahmetsálimqyzy óńirdiń ekonomikalyq áleýetin arttyrýǵa kúsh salyp keledi.
Parlamenttegi hanymdar
Elimizdiń zań shyǵarýshy organy – Parlamentte de áielder úlesi artyp keledi. Qazirgi tańda Senattaǵy 49 depýtattyń 10-y, al Májilistegi 97 halyq qalaýlysynyń 17-si – áielder. Olar zań jobalaryn talqylaý kezinde otbasy qundylyqtaryn, áleýmettik qorǵaýdy jáne demografiialyq máselelerdi basty nazarda ustaidy. Bul kórsetkishter memlekettik saiasattaǵy genderlik teńdik pen áielderdiń el bolashaǵyna qosyp jatqan ólsheýsiz úlesiniń aiqyn aiǵaǵy.
Memlekettiń mereiin ústem etip júrgen názik jandylardyń eńbegi árdaiym qurmetke laiyq!
