8 ناۋرىز – ايەلدەر قاۋىمىنىڭ قوعامداعى ورنىن تاعى ءبىر مارتە ەسكە سالاتىن ەرەكشە كۇن. بۇگىندە قازاقستاندىق حانىمدار عىلىمدا دا، كاسىپتە دە، مەملەكەتتىك باسقارۋ جۇيەسىندە دە بەلسەندى. وسى ورايدا Dalanews.kz رەداكسياسى جاۋاپتى قىزمەت اتقارىپ جۇرگەن بىلىكتى حانىمداردىڭ ءبىرقاتارىنا شولۋ جاسادى.
ۇكىمەت ءۇمىتىن ارقالاعان ءۇش مينيستر
قازىرگى تاڭدا ۇكىمەت قۇرامىندا 21 ءمينيستردىڭ ىشىندە ءۇش ايەل مينيستر قىزمەت اتقارادى.
ايدا بالايەۆا پرەمەر-مينيستردىڭ ورىنباسارى ءارى مادەنيەت جانە اقپارات ءمينيسترى قىزمەتىندە ەلدىڭ يدەولوگيالىق باعىتىنا ۇلەس قوسىپ كەلەدى. 2023 جىلدىڭ كۇزىندە مينيسترلىك تىزگىنىن ۇستاعان ول، 2025 جىلدىڭ سوڭىندا ۇكىمەت باسشىسىنىڭ ورىنباسارى دەڭگەيىنە دەيىن كوتەرىلدى. مەملەكەتتىك قىزمەتتتىڭ بارلىق ساتىسىنان وتكەن ساياساتكەر بۇعان دەيىن پرەزيدەنت اكىمشىلىگى مەن اقپارات مينيسترلىگىندە جاۋاپتى شەشىمدەر قابىلداپ، ءوزىنىڭ جوعارى كاسىبيلىگىن دالەلدەگەن. 
دەنساۋلىق ساقتاۋ ءمينيسترى اقمارال ءالنازاروۆا – مەديسينا عىلىمىنىڭ مايتالمانى ءارى تاجىريبەلى دارىگەر. 2024 جىلدان باستاپ مينيسترلىك تىزگىنىن قولعا الدى. بۇعان دەيىن سەنات دەپۋتاتى رەتىندە الەۋمەتتىك ساياسات پەن دەنساۋلىق ساقتاۋ ماسەلەلەرىنە قاتىستى باستامالار كوتەرگەن.
وقۋ-اعارتۋ ءمينيسترى جۇلدىز سۇلەيمەنوۆا ەلىمىزدىڭ ءبىلىم بەرۋ جۇيەسىن 2025 جىلدان باستاپ باسقارىپ كەلەدى. ول بۇل لاۋازىمعا ءماجىلىس دەپۋتاتى قىزمەتىنەن كەلىپ، جاستار ساياساتى مەن ءبىلىم سالاسىنداعى تۇيتكىلدى ماسەلەلەردى شەشۋگە بىلەك سىبانا كىرىستى. ۇرپاق تاربيەسى مەن ۇستازدار مارتەبەسىن كوتەرۋ جولىنداعى اۋقىمدى جۇمىستار جۇلدىز حانىمنىڭ تىكەلەي باقىلاۋىندا.
اكىم ايەلدەر كىمدەر؟
جەرگىلىكتى اتقارۋشى بيلىكتە دە ايەل اكىمدەردىڭ قولتاڭباسى ايقىن سەزىلەدى. اسىرەسە قالا اۋداندارى مەن ستراتەگيالىق ايماقتاردا حانىمداردىڭ باسقارۋ قابىلەتى جوعارى باعالانىپ كەلەدى.
مىسالى، الماتى قالاسىنىڭ ناۋرىزباي اۋدانىن 2023 جىلدان بەرى نازيرا توعىزبايەۆا باسقارادى. ول قارقىندى دامىپ كەلە جاتقان اۋماقتىڭ ينفراقۇرىلىمىن جاقسارتۋعا ەلەۋلى ۇلەس قوسىپ ءجۇر.
2022 جىلى جەتىسۋ اۋدانىنىڭ اكىمى بولىپ تاعايىندالعان ءلاززات جىلقىبايەۆا دا ءبىلىم جانە مەملەكەتتىك قىزمەتتەگى مول تاجىريبەسىن اۋداننىڭ الەۋمەتتىك احۋالىن كوتەرۋگە جۇمساپ كەلەدى.
وڭىرلەردە دە ايەل باسشىلاردىڭ ەڭبەگى ەرەن. ماسەلەن، الماتى وبلىسى ۇيعىر اۋدانىن بوتا ەلەۋسىزوۆا، جامبىل وبلىسى تاراز قالاسى جىبەك جولى اۋدانىن قارلىعاش ارالبەكوۆا باسقارىپ، جەرگىلىكتى حالىقتىڭ مۇڭ-مۇقتاجىن شەشۋدە بەلسەندىلىك تانىتىپ وتىر. سولتۇستىك قازاقستان وبلىسىنىڭ ەكى اۋدانىن دا ايەل اكىمدەر باسقارادى. 2022 بەرى اققايىڭ اۋدانىندا جانار قۇسايىن، ال مامليۋت اۋدانىندا ەلەنا ستەپانەنكو قىزمەت اتقارادى. اقمولا وبلىسىنىڭ جاقسى اۋدانىندا الماگۇل قادىرالينا، شىعىس قازاقستاننىڭ زايسان اۋدانىندا اەليتا احمەتسالىم قىزى ءوڭىردىڭ ەكونوميكالىق الەۋەتىن ارتتىرۋعا كۇش سالىپ كەلەدى.
پارلامەنتتەگى حانىمدار
ەلىمىزدىڭ زاڭ شىعارۋشى ورگانى – پارلامەنتتە دە ايەلدەر ۇلەسى ارتىپ كەلەدى. قازىرگى تاڭدا سەناتتاعى 49 دەپۋتاتتىڭ 10-ى، ال ماجىلىستەگى 97 حالىق قالاۋلىسىنىڭ 17ء-سى – ايەلدەر. ولار زاڭ جوبالارىن تالقىلاۋ كەزىندە وتباسى قۇندىلىقتارىن، الەۋمەتتىك قورعاۋدى جانە دەموگرافيالىق ماسەلەلەردى باستى نازاردا ۇستايدى. بۇل كورسەتكىشتەر مەملەكەتتىك ساياساتتاعى گەندەرلىك تەڭدىك پەن ايەلدەردىڭ ەل بولاشاعىنا قوسىپ جاتقان ولشەۋسىز ۇلەسىنىڭ ايقىن ايعاعى.
مەملەكەتتىڭ مەرەيىن ۇستەم ەتىپ جۇرگەن نازىك جاندىلاردىڭ ەڭبەگى ءاردايىم قۇرمەتكە لايىق!
