Energetıka mınıstrligi Kaspıı qubyry konsorsıýmy arqyly munaı tasymaldaý azaıdy degen aqparatqa túsinikteme berdi, dep habarlaıdy Dalanews.kz.

Mınıstrlik qazirgi ýaqytta KQK termınalynda munaı jóneltý SHAQ-1 (VPÝ) aılaq qurylǵysy arqyly júzege asyrylyp jatqanyn habarlady.

Tehnologıalyq proses akvatorıadaǵy aǵymdaǵy aýa raıyna baılanysty engizilgen túzetýlerdi eskere otyryp, shtattyq rejımde júrgizilip jatyr.

"Vedomstvonyń negizgi basymdyǵy eksporttyq jetkizilimderdiń turaqtylyǵyn qamtamasyz etý, sondaı-aq saqtaý qýattarynyń shamadan tys tolyp ketýine jol bermeý. Mınıstrlik jaǵdaıdy turaqty baqylaýda jáne halyqaralyq seriktestermen, konsorsıým operatorymen tikeleı baılanysta", - deıdi QR Energetıka mınıstriniń keńisshisi, mınıstrliktiń resmı ókili Ásel Serikpaeva. 

Eske salaıyq, buǵan deıin Kaspıı qubyry arqyly qazaq munaıyn tasymaldaý azaıǵany habarlanǵan edi. Bloomberg dereginshe, eksporttyń azaıýyna aýa raıynyń qolaısyzdyǵy, tehnıkalyq jóndeý jumystary jáne ınfraqurylymdaǵy aqaýlar áser etken.