Arystanbek myrzanyń argýmenti “ministrlikte jii-jii aýys-túiis boldy, vedomstvoda sporttan maqurym mamandar otyr” degenge saiady.
Al Raiymqulova batyly baryp, otstavkaǵa ketý týraly aryz jazýy qajet-aq. Ómir óz arnasymen aǵa bermek, otstavka ministrdiń taǵdyryna teris etedi dep oilaý aǵattyq.
Osy tóńirektegi áńgimeniń tiegin aǵytyp, “Jetinshi arnaǵa” jeti minýttyq suhbat bergen Muhamediuly óziniń tusynda mundai nashar nátijege jol bermegenin aityp, ótken-ketkendi qozǵaǵan eken.
Aitýynsha, Tokiodan oralǵan ulttyq quramanyń kórsetkishine kúlli eldiń kóńili tolmaidy. Sportshylardyń udaiy jeńilisinen keiin jankúierler de jasyp qalǵan. Altyn alady-aý degen talai tarlanbozdyń taýy shaǵylǵany osy salaǵa kúrdeli reforma kerektigin ańǵartyp otyr.
Altyn pen kúmiske talasatyn potentsialymyz bola tura, qola medalǵa qýanǵanymyz quldyraýdyń belgisi.
Sói degen Muhamediuly óziniń tusynda mundai uiatty jaǵdaidyń bolmaǵanyn eske salypty.
“Osydan tórt jyl burynǵy alamanda talaidan oza shaptyq. Altyndy da aldyq, kúmis te kórdik. Tipti qolany qomsynǵan jaǵdaiǵa jettik. Rio Olimpiadasynda 10 sportshymyz qola júldeger atandy, 5 sportshymyz kúmispen kúpteldi. Kúmis alǵandar kúshenip jiberse altyn alǵan bolar edi”, – dep aǵynan jaryldy Arystanbek myrza.
Al bul jolǵy sátsizdiktiń sebebi nede nemese kimde? Muhamediuly muny ministrliktegi kadrlyq aýys-túiisten kóredi. Áitpese sportshylardyń daiyndyǵynda kinárat joq. Tokioda qanjyǵany mailap qaitaryna senimdi bolǵan. Tek...
“Olimpiadanyń qarsańynda ministrliktegi sport salasyna jaýapty úsh birdei vitse-ministr apyl-ǵupyl aýysty. Eldegi boks pen kúres sportynyń ahýalymen jaqsy tanys Eldos Ramazanovty ornynan bosatyp, Sáken Musaibekovty taǵaiyndady, artynsha bul qyzmetke Erlan Qojaǵapanov keldi.
Sport komitetiniń tóraǵasy, dańqty boksshy Serik Sápievti Olimpiadaǵa nebary alty ai qalǵanda dekrettik demalysqa jiberdi. Serikti tipti qyzmetinen bosatpaq bolǵan.
Onyń orynbasary bolǵan Serik Jarasbaev Tokioǵa sanaýly kúnder qalǵanda oilamaǵan jerde qyzmetinen ketti. Áigili “Týr de Frans” velojarysynda 7-shi orynǵa ilikken Aleksei Lýtsenkonyń ustazy, tanymal sportshy Aleksandr Vinokýrovty saladan shettetip jiberdi” , – deidi Arystanbek Muhamediuly.
Eks-ministr muny qazirgi ministrge baǵyttap aitqany anyq. Raiymqulovanyń aiybyn jipke tizgen Muhamediuly tiliniń ushynda turǵan otstavka týraly áńgimeni aqyry aitypty.
“Olimpiada nátijesine kúlli el kýá. Osydan keiin ministr Raiymqulova qyzmetinen ketýi qajet pe?” degen tilshi saýaly otqa mai quia túsken eken.
Muhamediulynyń pikirinshe, otstavka belgili bir ministrdiń saiasi mansabyna núkte qoiǵandy bildirmeidi, odan keiin de ómir bar.
“Óz erkimen ornynan ketken talai ministrdi bilemin. Jer daýy ulttyq narazylyqqa ulasqan tusta sol kezdegi Ekonomika ministri Erbolat Dosaev Nazarbaevqa aryz jazyp, otstavkaǵa jiberýin ótingen. Ol budan utylǵan joq.
Mádeniet jáne sport ministrliginiń jumysynda – jeńis pen jeńilis itjyǵys túsip jatady. Jetistikke jetseń, úzdiksiń, jeńimpazsyń. Al eger nátijeń nashar bolsa, ol jaǵy túsinikti...”, – dep bulyńǵyrlaý jaýap qatqan eken eks-ministr.
“Aqtoty Raiymqulova otstavkaǵa ketýi kerek pe?” degen saýaldy qaitara qoiǵan tilshige: “Mindetti. Jaýapkershilikten qashpaýy tiis”, – dep jaýap qatty Muhamediuly.
Aita ketelik, Tokio Olimpiadasynda Qazaqstan quramasy 8 qola medaldy mise tutyp, jalpykomandalyq tizimde 83-shi oryn aldy. Bul osyǵan deiin ótken jazǵy Olimpiada oiyndaryndaǵy Qazaqstan quramasynyń eń nashar kórsetkishi.
Arystanbek Muhamediuly 2014-2019 jyldardyń aralyǵynda Mádeniet jáne sport ministrligin basqardy.
https://www.youtube.com/watch?v=w0Db26UVuSg
