Ministr Osakarovka aýdanyndaǵy jumyspen qamtý ortalyǵynyń jumysymen tanysty jáne jańa formattaǵy Ataýly áleýmettik kómektiń júrgizilýindegi daiyndyq deńgeiine baǵa berip, materialdyq-tehnikalyq jabdyqtalýyna jáne ortalyq keńesshileri men kómekshileriniń kásibi daiyndyǵyna basa nazar aýdardy.
– Ataýly áleýmettik kómek tek aqshalai tólem ǵana emes, kedeilikten shyǵýdyń keshendi sharasy. Sondyqtan búgingi tańda eńbekpen qamtý ortalyqtary osy ózgeris nátijesinde burynǵydan góri qoljetimdi bolýy, al onyń mamandary halyqqa «bir tereze» qaǵidasy boiynsha qyzmettiń barlyq túrlerin sapaly kórsetýge daiyn bolýy úshin der kezinde qajetti sharalar qabyldaý asa mańyzdy, – dep túiindedi óz sózin ministr.
«Órleý» pilottyq jobasy týraly óz pikirimen Natalia Fedýlova bólisti. Jalǵyz basty ana Natalia Fedýlova 2015 jyly 150 myń teńge kóleminde qarjylyq qoldaýǵa ie bolyp, óziniń jeke kásibin ashqan bolatyn. Búginde bul otbasynyń súiikti isi – shashtaraz qyzmeti otbasynyń negizgi tabys kózine ainalǵan.
– Osy biregei baǵdarlamanyń kómegimen shaǵyn biznesimdi ashtym jáne óz josparlarymdy senimdi túrde júzege asyra alamyn. Endi men ekonomikanyń damýyna barynsha úlesimdi qosyp, ózimniń aýyldastaryma paida tigizemin – dep Natalia Fedýlova óz áserimen bólisti.
Bir aita keterligi, Qaraǵandy oblysy boiynsha alǵashqylardyń biri bolyp, Osakarovka aýdanynda 2015 jyldyń shildesinde «Órleý» pilotty jobasy qolǵa alynǵan bolatyn. Joba júzege asyryla bastaǵan eki jylda 50-den astam otbasy nemese 270-ke jýyq adam tartyldy. Jalpy somasy 8 mln. teńgeden astam mólsherde shartty aqshalai kómek kórsetilgen.
Bul sharalar áleýmettik az qamtylǵan azamattardyń jan basyna shaqqandaǵy tabys mólsherin eki esege (6 358,0 teńgeden 12 572,0 teńgege deiin) kóbeitýge múmkindik berdi
2017 jyly «Órleý» jobasyn júzege asyrý úshin 13 mln. teńge shamasynda qarajat qarastyrylǵan, onyń 2,5 mln.teńgesi – aýdan biýdjetinen, qalǵany – respýblikalyq biýdjetten bólindi.
Aýdan ortalyǵyna sapar qorytyndysy boiynsha, ministr aýyldyq okrýg ákimderimen, aýdandyq jumyspen qamtý ortalyqtary basshylary jáne qyzmetkerlerimen kezdesti.
Kezdesýde negizinen AÁK (ataýly áleýmettik kómek) pen zeinetaqy júiesinde bolatyn ózgerister talqylady.
Búgingi tańda basty mindet retinde Tamara Dúisenova jańa formattaǵy ataýly áleýmettik kómek kórsetýdi, sondai-aq halyq arasynda aqparattyq-túsindirý jumystarynyń júrgizý mańyzdylyǵyn atap ótti.
Qaraǵandy oblysynyń ákimi Erlan Qoshanov:
– Jańa formattaǵy ataýly áleýmettik kómek bizdiń aimaq úshin tańsyq emes. "Órleý" pilotty jobasy eki jyldan astam ýaqyttan beri Qaraǵandy oblysynda júrgizilip keledi. Biz is júzinde jobanyń barlyq qyr-syryna qanyqtyq jáne ol ózin aqtai alady dep aitýǵa bolady. "Órleý" jobasyna 2,5 jyl ishinde shamamen 2,5 myń adam qatysty. Olardyń birazy, qaita oqytýdan ótip, jumysqa ornalastyryldy nemese jeke isin ashty. Olar buryn kedeilik deńgeiinen tómengi adamdar qatarynda bolatyn, – dedi oblys basshysy.
Sondai-aq, Ministr halyqty jumyspen qamtý taqyrybyna da toqtaldy. Bul baǵytta ministrlik jumys berýshiler men jumys izdeýshiler úshin úlken alań bola alatyn Elektrondy Eńbek birjasy men enbek.kz saityn ázirledi.
Ministrdiń isker áielder qaýymdastyǵy, Qazaqstan halqy Assambleiasynyń músheleri, «Nur Otan» partiiasy men úkimettik emes uiym ókilderiniń qatysýymen ótken kezdesýi tiisti deńgeide ótti.
Bastysy, zeinetaqy júiesin jańǵyrtý jaǵdaiy talqylandy. Bul reforma - áleýmettik ádilettilikti qalpyna keltirýge baǵyttalǵan shara. Jiynǵa qatysýshylar osyǵan kóńil aýdaryp, ózerin tolǵandyryp júrgen suraqtaryn qoidy.
Olarǵa bazalyq zeinetaqy kóleminiń qalai ózgeretini týraly Tamara Dúisenova túsindirip berdi.
– Kelesi jyldan bastap bazalyq zeinetaqy – zeinetaqy júiesine qatysý uzaqtyǵyna qarai taǵaiyndalady. Iaǵni, 1998 jyldan keiingi jinaqtaýshy zeinetaqy júiesindegi jarna tóleý kezeńi ǵana emes, sonymen birge 1998 jylǵa deiingi merzim de eskeriledi, – dedi Tamara Dúisenova.
Ministrdiń pikirinshe, mundai kózqaras 30-40 jyl eńbek ótili bar tómen zeinetaqy alyp otyrǵan zeinetkerler úshin ádiletti bolady. 33 jyldan astam tájiribesi bar adamdar úshin 1998 jylǵa deiin jáne 1998 jyldan keiin, bazalyq zeinetaqynyń mólsheri qazirgi kezdegimen salystyrǵanda eki esege ósedi. Eger búgingi tańda ol 14 myń teńge bolsa, 2018 jyldyń 1 shildesinen bastap zeinetkerlerdiń bul toby 28 myń teńge alady.
Eske sala keteiik, áleýmettik qorǵaý salasyndaǵy reformalardy júzege asyrýda Eńbek jáne halyqty áleýmettik qorǵaý ministri Tamara Dúisenova el óńirlerinde túsindirý jumystaryn júrgizip keledi. Sonyń ishinde Osakarovka ministrdiń jumys saparmen barǵan alǵashqy aýdany boldy.
«QmD» aqparat
