مينيستر وساكاروۆكا اۋدانىنداعى جۇمىسپەن قامتۋ ورتالىعىنىڭ جۇمىسىمەن تانىستى جانە جاڭا فورماتتاعى اتاۋلى الەۋمەتتىك كومەكتىڭ جۇرگىزىلۋىندەگى دايىندىق دەڭگەيىنە باعا بەرىپ، ماتەريالدىق-تەحنيكالىق جابدىقتالۋىنا جانە ورتالىق كەڭەسشىلەرى مەن كومەكشىلەرىنىڭ كاسىبي دايىندىعىنا باسا نازار اۋداردى.
– اتاۋلى الەۋمەتتىك كومەك تەك اقشالاي تولەم عانا ەمەس، كەدەيلىكتەن شىعۋدىڭ كەشەندى شاراسى. سوندىقتان بۇگىنگى تاڭدا ەڭبەكپەن قامتۋ ورتالىقتارى وسى وزگەرىس ناتيجەسىندە بۇرىنعىدان گورى قولجەتىمدى بولۋى، ال ونىڭ ماماندارى حالىققا «ءبىر تەرەزە» قاعيداسى بويىنشا قىزمەتتىڭ بارلىق تۇرلەرىن ساپالى كورسەتۋگە دايىن بولۋى ءۇشىن دەر كەزىندە قاجەتتى شارالار قابىلداۋ اسا ماڭىزدى، – دەپ تۇيىندەدى ءوز ءسوزىن مينيستر.
«ورلەۋ» پيلوتتىق جوباسى تۋرالى ءوز پىكىرىمەن ناتاليا فەدۋلوۆا ءبولىستى. جالعىز باستى انا ناتاليا فەدۋلوۆا 2015 جىلى 150 مىڭ تەڭگە كولەمىندە قارجىلىق قولداۋعا يە بولىپ، ءوزىنىڭ جەكە كاسىبىن اشقان بولاتىن. بۇگىندە بۇل وتباسىنىڭ سۇيىكتى ءىسى – شاشتاراز قىزمەتى وتباسىنىڭ نەگىزگى تابىس كوزىنە اينالعان.
![](/uploads/images/20240128004644948.jpg)
– وسى بىرەگەي باعدارلامانىڭ كومەگىمەن شاعىن بيزنەسىمدى اشتىم جانە ءوز جوسپارلارىمدى سەنىمدى تۇردە جۇزەگە اسىرا الامىن. ەندى مەن ەكونوميكانىڭ دامۋىنا بارىنشا ۇلەسىمدى قوسىپ، ءوزىمنىڭ اۋىلداستارىما پايدا تيگىزەمىن – دەپ ناتاليا فەدۋلوۆا ءوز اسەرىمەن ءبولىستى.
ءبىر ايتا كەتەرلىگى، قاراعاندى وبلىسى بويىنشا العاشقىلاردىڭ ءبىرى بولىپ، وساكاروۆكا اۋدانىندا 2015 جىلدىڭ شىلدەسىندە «ورلەۋ» پيلوتتى جوباسى قولعا الىنعان بولاتىن. جوبا جۇزەگە اسىرىلا باستاعان ەكى جىلدا 50-دەن استام وتباسى نەمەسە 270-كە جۋىق ادام تارتىلدى. جالپى سوماسى 8 ملن. تەڭگەدەن استام مولشەردە شارتتى اقشالاي كومەك كورسەتىلگەن.
بۇل شارالار الەۋمەتتىك از قامتىلعان ازاماتتاردىڭ جان باسىنا شاققانداعى تابىس مولشەرىن ەكى ەسەگە (6 358،0 تەڭگەدەن 12 572،0 تەڭگەگە دەيىن) كوبەيتۋگە مۇمكىندىك بەردى
2017 جىلى «ورلەۋ» جوباسىن جۇزەگە اسىرۋ ءۇشىن 13 ملن. تەڭگە شاماسىندا قاراجات قاراستىرىلعان، ونىڭ 2،5 ملن.تەڭگەسى – اۋدان بيۋدجەتىنەن، قالعانى – رەسپۋبليكالىق بيۋدجەتتەن ءبولىندى.
اۋدان ورتالىعىنا ساپار قورىتىندىسى بويىنشا، مينيستر اۋىلدىق وكرۋگ اكىمدەرىمەن، اۋداندىق جۇمىسپەن قامتۋ ورتالىقتارى باسشىلارى جانە قىزمەتكەرلەرىمەن كەزدەستى.
كەزدەسۋدە نەگىزىنەن ااك (اتاۋلى الەۋمەتتىك كومەك) پەن زەينەتاقى جۇيەسىندە بولاتىن وزگەرىستەر تالقىلادى.
بۇگىنگى تاڭدا باستى مىندەت رەتىندە تامارا دۇيسەنوۆا جاڭا فورماتتاعى اتاۋلى الەۋمەتتىك كومەك كورسەتۋدى، سونداي-اق حالىق اراسىندا ءاقپاراتتىق-تۇسىندىرۋ جۇمىستارىنىڭ جۇرگىزۋ ماڭىزدىلىعىن اتاپ ءوتتى.
قاراعاندى وبلىسىنىڭ اكىمى ەرلان قوشانوۆ:
– جاڭا فورماتتاعى اتاۋلى الەۋمەتتىك كومەك ءبىزدىڭ ايماق ءۇشىن تاڭسىق ەمەس. "ورلەۋ" پيلوتتى جوباسى ەكى جىلدان استام ۋاقىتتان بەرى قاراعاندى وبلىسىندا جۇرگىزىلىپ كەلەدى. ءبىز ءىس جۇزىندە جوبانىڭ بارلىق قىر-سىرىنا قانىقتىق جانە ول ءوزىن اقتاي الادى دەپ ايتۋعا بولادى. "ورلەۋ" جوباسىنا 2،5 جىل ىشىندە شامامەن 2،5 مىڭ ادام قاتىستى. ولاردىڭ ءبىرازى، قايتا وقىتۋدان ءوتىپ، جۇمىسقا ورنالاستىرىلدى نەمەسە جەكە ءىسىن اشتى. ولار بۇرىن كەدەيلىك دەڭگەيىنەن تومەنگى ادامدار قاتارىندا بولاتىن، – دەدى وبلىس باسشىسى.
سونداي-اق، مينيستر حالىقتى جۇمىسپەن قامتۋ تاقىرىبىنا دا توقتالدى. بۇل باعىتتا مينيسترلىك جۇمىس بەرۋشىلەر مەن جۇمىس ىزدەۋشىلەر ءۇشىن ۇلكەن الاڭ بولا الاتىن ەلەكتروندى ەڭبەك بيرجاسى مەن enbek.kz سايتىن ازىرلەدى.
ءمينيستردىڭ ىسكەر ايەلدەر قاۋىمداستىعى، قازاقستان حالقى اسسامبلەياسىنىڭ مۇشەلەرى، «نۇر وتان» پارتياسى مەن ۇكىمەتتىك ەمەس ۇيىم وكىلدەرىنىڭ قاتىسۋىمەن وتكەن كەزدەسۋى ءتيىستى دەڭگەيدە ءوتتى.
باستىسى، زەينەتاقى جۇيەسىن جاڭعىرتۋ جاعدايى تالقىلاندى. بۇل رەفورما - الەۋمەتتىك ادىلەتتىلىكتى قالپىنا كەلتىرۋگە باعىتتالعان شارا. جيىنعا قاتىسۋشىلار وسىعان كوڭىل اۋدارىپ، وزەرىن تولعاندىرىپ جۇرگەن سۇراقتارىن قويدى.
ولارعا بازالىق زەينەتاقى كولەمىنىڭ قالاي وزگەرەتىنى تۋرالى تامارا دۇيسەنوۆا ءتۇسىندىرىپ بەردى.
– كەلەسى جىلدان باستاپ بازالىق زەينەتاقى – زەينەتاقى جۇيەسىنە قاتىسۋ ۇزاقتىعىنا قاراي تاعايىندالادى. ياعني، 1998 جىلدان كەيىنگى جيناقتاۋشى زەينەتاقى جۇيەسىندەگى جارنا تولەۋ كەزەڭى عانا ەمەس، سونىمەن بىرگە 1998 جىلعا دەيىنگى مەرزىم دە ەسكەرىلەدى، – دەدى تامارا دۇيسەنوۆا.
ءمينيستردىڭ پىكىرىنشە، مۇنداي كوزقاراس 30-40 جىل ەڭبەك ءوتىلى بار تومەن زەينەتاقى الىپ وتىرعان زەينەتكەرلەر ءۇشىن ادىلەتتى بولادى. 33 جىلدان استام تاجىريبەسى بار ادامدار ءۇشىن 1998 جىلعا دەيىن جانە 1998 جىلدان كەيىن، بازالىق زەينەتاقىنىڭ مولشەرى قازىرگى كەزدەگىمەن سالىستىرعاندا ەكى ەسەگە وسەدى. ەگەر بۇگىنگى تاڭدا ول 14 مىڭ تەڭگە بولسا، 2018 جىلدىڭ 1 شىلدەسىنەن باستاپ زەينەتكەرلەردىڭ بۇل توبى 28 مىڭ تەڭگە الادى.
ەسكە سالا كەتەيىك، الەۋمەتتىك قورعاۋ سالاسىنداعى رەفورمالاردى جۇزەگە اسىرۋدا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەل وڭىرلەرىندە ءتۇسىندىرۋ جۇمىستارىن جۇرگىزىپ كەلەدى. سونىڭ ىشىندە وساكاروۆكا ءمينيستردىڭ جۇمىس ساپارمەن بارعان العاشقى اۋدانى بولدى.
«قمد» اقپارات