"Kodekstegi bir ǵana túzetý 6 ret qoǵamdyq talqylaýdan ótip, 43 memlekettik mekeme túzetý usynǵan. Qyryq jamaý bolǵan kodeks transplantatsiia men vaktsinatsiianyń tóńireginde áńgime órbitken jiynda taǵy talqyǵa tústi. Talqylai bergeni sol edi, jiylǵan jurttyń arasynda ekpeniń paidasyn kórem dep, balasynan airylǵan ananyń sózi otyrystyń aýanyn ózgertip jiberdi", - deidi telearna tilshisi.
- Men mindetti ekpege túbegeili qarsymyn. Qazirgi ýaqytta bul ustanymymdy barlyq jerde aityp, halyqaralyq sarapshylarmen bailanysqa shyǵamyn. Sebebi, bizdiń sheneýnikter men aqsha qýǵan dárigerlerge senýden qaldym.
Kelinshektiń shyrqyraityn jóni bar. Eki jasar balasy ekpeden soń kóz jumǵan. Sharq urǵan ananyń taýy shaǵylyp, ministrdiń aldynda jaǵdaiyn aitýdan basqa lajy qalmapty.
Alaida ministr Birtanov "bizben bailanysqa shyǵyp, hat joldańyz" degennen basqa jóndi jaýap qata almai, aqtalǵan keiipte áńgimelerin vaktsinatsiianyń paidasy jaǵyna oiystyryp jiberdi.
Keltirilgen derekterge sensek, biylǵa 21 virýsqa qarsy ekpe jasaýǵa 26 milliard teńge bólingen.
Eljan Birtanov, QR Densaýlyq saqtaý ministri:
- Árbir kóterilgen másele – mańyzdy. Bul jai másele emes. Bizge de, osy búgingi jinalysqa qatysyp otyrǵan áriptesterimizge, parlament depýtattaryna. Bul eldiń densaýlyǵyn arttyrýǵa atqarylyp jatqan jumys. Bul jai zań emes, bul eldiń bolashaq densaýlyǵy týraly zań. Mamandardyń dereginshe, vaktsinatsiiadan bas tartatyndar kóp jaǵdaida jalǵan, negizsiz aqparattyń jeteginde ketkender.
"Ekpelerge qatysty teris kózqarasty qalyptastyrýdyń ózi qoldan qasaqana jasalǵan amal", - deidi elimizdiń Bas sanitar dárigeri.
Jandarbek Bekshin, Qoǵamdyq densaýlyq saqtaý komitetiniń tóraǵasy:
- Ekpege qarsy kompaniiaǵa úlken farmkompaniialardyń tizginin ustaǵan adamdar arnaiy tapsyrys beredi. Mundai derekterdiń halyqaralyq deńgeide 57 paiyzy dáleldengen. Nege deseńizder, ekpeniń arqasynda talai virýstyq derttiń aldyn alýǵa bolady. Bul dár-dármektiń saýdasy toqyraidy degen sóz.
Resmi derekter boiynsha, qyzylsha dertinen, biyl 21 adam kóz jumǵan.
Sonyń 19-na atalǵan virýsqa qarsy ekpe jasalmaǵan bop shyqty. Qyzylshadan qaitys bolǵandardyń basym kópshiligi – balalar. Sondyqtan jańa kodeks boiynsha endi mektepke deiingi jastaǵy balalardy vaktsinatsiialaý mindetti talap bolmaq.
