"Pavlodar ózen porty" kompaniiasy milliardtaǵan tenderlerdi utyp, jobalardy keshiktirip, qunyn birneshe ese ósirgenine qaramastan, áli kúnge deiin memlekettik organdardyń qoldaýyna ie bolyp keledi, dep habarlaidy Dalanews.kz.
Orda.kz málimetinshe, 2020 jyly kompaniia Qoshqar-Ata qaldyq qoimasyn rekýltivatsiialaý jobasyn 15,5 mlrd teńgege alǵan. Bes jyl ótse de, jumys aiaqtalmai, joba quny 50,9 mlrd teńgege deiin ósken. Bastapqyda 2024 jylǵa belgilengen merzim 2026 jyldyń sońyna shegerilgen.
Dál osyndai jaǵdai Atyraýdaǵy kárizdik tazartý qurylǵylaryn qaita qurý jobasynda da qaitalandy: 18,5 mlrd teńgelik kelisimshart keiin 39,7 mlrd teńgege deiin qymbattap, merzim 2026 jylǵa uzartyldy.
Kompaniia milliardtaǵan tapsyrysqa ie bolsa da, qarjylai turaqtylyq baiqalmai tur. Máselen, 2022 jyly tabysy 21,9 mlrd teńge bolsa, qaryzy 3,4 mlrd teńgege jetken. 2023 jyly tabysy 25,9 mlrd, qaryzy 5,4 mlrd teńge bolǵan. Al 2024 jyly kreditorlyq bereshek 24,6 mlrd teńgege deiin kóbeigen.
Sonymen qatar affiliirlengen kompaniialar úshin 24,5 mlrd teńgeniń múlki kepilge qoiylǵan.
Qarjylai qysymǵa qaramastan, basshylyq syiaqydan qaǵylmaǵan. 2022 jyly – 56,4 mln teńge, 2023 jyly – rekordtyq 230,4 mln teńge, al 2024 jyly – 88,7 mln teńge tólengen.
Kompaniianyń artynda belgili tulǵalar turǵany jasyryn emes. Quryltaishysy – Májilis depýtaty ári Prezidenttiń burynǵy keńesshisi Meiram Pishembaev. Keiinnen basqarýdy qyzy Dolores Pishembaeva men Anetta Saǵynbekke tiesili "San" JShS aldy. Dolorestiń óz atyna tirkelgen jeti kompaniiasy bar.
Aita keteiik, buǵan deiin "Pavlodar ózen porty" Almatydaǵy Úlken Almaty ózeniniń jaǵalaýyn qaita qurý jobasyn da qolǵa alǵan. 2024 jyldyń qazanynda bastalǵan bul jumys 5,7 shaqyrymdyq aýmaqty qamtidy. Jospar boiynsha tireýish qabyrǵalar aýystyrylyp, jaiaý júrginshiler kópirleri, balalar alańdary, velojoldar men demalys aimaqtary salynýy tiis edi.
Jobaǵa shamamen 8 mlrd teńge bólingen.
Erbolat Dosaev ákim bolǵan tusta atalǵan kompaniia Almatyda birqatar iri jobany utyp alǵan. Mysaly, buǵan deiin 12 mlrd teńgege Sairandy jóndese, 11 mlrd teńgege Úlken Almaty kanalyn qaita qurýmen ainalysqan.
