Milliarderdiń ulyna jazǵan haty
Saǵan bul hatty jazýyma 3 nárse sebep boldy:
- Taǵdyrdy boljap bolmaidy, eshkim de óziniń qansha ómir súretinin bilmeidi, sondyqtan kei nárselerdi erterek aitqan durys.
- Men seniń ákeńmin, mundai aqyl keńesti saǵan men aitpaǵanda kim aitady.
- Saǵan aitatyndarymnyń barlyǵy meniń ómir jolymda kezdesken kedergilerden alǵan sabaqtarym, sondyqtan osy sátsizdikterimdi qaitalamaýyń úshin paidasy bolar dep sanadym.
1) Seni jaqtyrmaǵan, saǵan nashar kózqaraspen qaraǵan adamdarǵa eshqashan renjime, óitkeni shesheń ekeýimizden basqa eshkim de saǵan boryshtar emes. Eger de bireý saǵan qamqorlyq tanytar bolsa ony qadirlei bil.
2) Ómirińde kezdesken kez kelgen adamdy nemese baǵaly zatty, basqa eshkim, eshnárse onyń ornyn basa almaidy dep qarama, osy kózqarasta myqty bolsań bolashaqta asylyńnan aiyrylyp qalsań da sabyrly bola alasyń.
3) Ómir óte qysqa, dál qazir ýaqytyńdy bosqa ótkizip júrgenińdi dám-tuzyń taýsyla bastaǵanda bilesiń, ómirdi qanshalyqty erterek qasterlei bastasań ómirden alatyn lzzatyń da sonshalyq kóp bolady. Uzaq ómir súrýdi armandaǵannan góri ýaqytty únemdei bilgen durys.
4) Mahabbat degen bir túrli sezim ǵana, bul sezim ýaqyttyń ótýimen, jasaǵan ortańnyń aýysýymen birge ózgerip otyrady. Eger kúnderdiń birinde súigenińnen aiyrylyp qalsań sabyrlylyqpen kút, ýaqyttyń ózi barlyǵyn umyttyrady, kóńiliń de sabasyna túsedi. Mahabbattan bal jutam dep ólermendene berilip te ketpe, mahabbattan keletin qaiǵydan qabyrǵań qaiysyp shógip te ketpe.
5) Kóptegen tabysqa jetken kásipkerlerdiń bilimi ortasha bolǵan, biraq bul qulshyna úirenbegen adam da tabysqa jete alady degendik emes. Esińde bolsyn bilimiń eshkim sennen tartyp ala almaityn eń myqty qarýyń. Adam bilimsiz de kásip jarata alady, biraq bilimsiz báribir de ony damyta almaidy.
6) Qalǵan ómirimde men saǵan meni baq dep talap qoimaimyn, dál sol siiaqty sen kámelettik jasqa jetken soń meniń de jaýapkershiligim aiaqtalady. Ómir boiy qoǵamdyq kólikpen júresiń be álde Mersedes minesiń be, qara kóje ishesiń be álde mai shainaisyń ba, ol óz qolyńda.
7) Óziń ýadege berik bol, biraq basqalarǵa bul talapty qoia almaisyń. Basqalarǵa únemi iltipatpen qara, biraq basqalarǵa da ózińe jaqsy kózben qara dep talap qoia almaisyń. Sen olarǵa qalai qarasań olar da saǵan solai qarai bermeidi. Eger osy aqiqatty jete túsine almasań ómirde basy artyq keleńsizdikterge ushyrai beresiń.
8) Men 26 jyl boiy lotereia biletin satyp alyp kelemin, áli bir de bir ret utqan joqpyn, tipti 3 dárejeli utysqa da jetkem joq. Bul degenimiz adam tabysqa jetý úshin qulshyna úirenip, tynbai eńbek etý kerektiginiń dáleli, myna álemde aqy almaityn ashana joq.
9) Ómir bir aq ret beriledi, sondyqtan da et jaqyn týysqandaryńdy, janashyr jaqyndaryńdy qadirlei bil, Ekeýimiz de máńgi birge bola almaimyz, qara kóz jumylǵan soń eshqashan qaýysha almaimyz.
Bul hatty oqyp bitken kezde sende eki tańdaý bolady:
- Birinshisi, sen muny odan ary damytyp, ózińe máńgi azyq bolatyn rýhani kómekshi etip saqtaisyń.
- Ekinshisi, eshteńe oqymaǵan kórmegendei bolyp burynǵy ómirińdi jalǵastyrasyń".
Aýdarǵan Serjan Qasen.
Derekkózi: mazhab.kz
