Búgin Halyq jazýshysy Muhtar Maǵaýın qaıtys boldy. Jazýshynyń jerleý rásimi AQSH-ta ótedi, - dep habarlaıdy Dalanews.kz.
Bul týraly İT salasyndaǵy maman Tımýr Bektur jazdy.
"Ágárákı, AQSH-ta júrgender bolsa, rásimderi osyndaı:
- qańtardyń 9-y, beısenbi aqshamda dúnıe salǵan Muhtar Maǵaýınniń janazasy erteń, qańtardyń 11-i senbi kúni saǵat 10:00-de túriktiń Diyanet Center of America meshitinde (9610 Good Luck Rd, Lanham, MD 20706) oqylady,
- qonaqasy da sol orynda 13:00-de beriledi.
- jerleý rásimi 11:00-de Parklawn Memorial zıratynda (12800 Veirs Mill Rd, Rockville, MD 20853) ótedi", - dedi ol.
Aıta keteıik, Muhtar Muqanuly Maǵaýın 1940 jyly 2 aqpanda Semeı oblysynyń Shubartaý aýdanynda týǵan. 1962 jyly Qazaq memlekettik ýnıversıtetiniń fılologıa fakúltetin, 1965 jyly aspırantýrasyn bitirgen. Eńbek joly 1965 jyldan bastalady. «Qazaq ádebıeti» gazetinde bólim meńgerýshisi, 1967 – 71 jj. «Jazýshy» baspasynda bas redaktordyń orynbasary, Qazaq KSR Ǵylym akademıasynyń M.Áýezov atyndaǵy Ádebıet jáne óner ınstıtýtynda aǵa ǵylymı qyzmetker bolyp, sonymen qatar Máskeýde M.Gorkıı atyndaǵy Ádebıet ınstıtýtynda qazaq fólklory men qazaq ádebıeti tarıhy boıynsha arnaıy leksıalyq kýrstar júrgizdi. 1983 – 84 jj. erkin shyǵarmashylyq jumysta, 1984 – 86 jj. «Jazýshy» baspasynyń bas redaktory, 1987 jyly erkin shyǵarmashylyq jumys- ta, 1988 – 2006 jj. «Juldyz» jýrnalynyń bas redaktory boldy.
Baspasóz betinde alǵash ret 1959 jyly kórindi. 60-jyldary negizinen ádebıet zertteýshisi retinde tanyldy. Budan sońǵy kezeńde kórkem prozaǵa kóbirek den qoıdy. Shyǵarmalary orys tiline aýdarylǵan, shetel tilderinde basylǵan. Fılologıa ǵylymynyń kandıdaty (1967). Qazaqstan Jazýshylar odaǵy Basqarmasynyń hatshysy. «Alasapyran» tarıhı roman-dılogıasy úshin Qazaq KSR-iniń Abaı atyndaǵy memlekettik syılyǵy berildi. Qazaqstannyń Halyq jazýshysy (1984). Túrkıanyń halyqaralyq «Túrik dúnıesine qyzmet» syılyǵynyń ıegeri (1997). «Tarlan» syılyǵynyń laýreaty (2002). Qazaqstannyń Qurmetti jazýshysy (2019).
