Belgili qoǵam qairatkeri Muhamedjan Tazabek jelidegi paraqshasynda Bekbolat Tileýhan jaily jazba jariialady, dep habarlaidy dalanews.kz.
"Aǵkem de alpysqa keldi! Bekbolat aǵa týraly men kóp nárse aita alamyn. Biraq búgingi mereitoidyń oraiyna qarai, úsh-aq nárseni aitaiyn.
Birinshisi – jurt biletin Bekbolat aǵadan bólek, jurt bile bermeitin Bekbolat (Aǵke) bar. Onyń qansha adamnyń taǵdyryndaǵy jetistikke únsiz sebepker bolǵanyn, qansha azamattyń jolyn ashqanyn, qansha jaqsylyqty jariialamai jasaǵanyn biz shamalap bilemiz. Al, bútin haiyryn bir Alla biledi.
Óz basymda Bekbolat aǵanyń jaqsylyǵy shash etekten. Jarymmen jolyǵýyma tikelei sebepker bolǵan da – osy kisi. Rýhaniiatqa, dinge qyzmet etetin joldyń alǵashqy esigin ashqan da – osy kisi. Halifa Altai atamyzdyń qoryndaǵy qyzmetten bastap, Prezident orkestrindegi jyldarǵa deiin qasynan tastamai, ómirdiń de, elge qyzmettiń de talai sabaǵyn kórsetti. Biz óte jaqyn bolǵandyqtan "ustazym edi" dep resmilendirgim kelmeidi. Keibir qarym-qatynastyń aty bolmaidy. Aǵalyqtan bastalyp, týystyqtan da tereń bir jaqyndyqqa ainalyp ketedi. Únsiz duǵańa qosasyń, kózi joqta jamandatpaisyń, aqysy qap bara jatsa, alyp kep beresiń… Meniń Bekbolat aǵamen bailanysym – sondai.
"Segiz qyrly, bir syrly" degen sóz keide jai teńeý sekildi aityla beredi. Al Bekbolat aǵany kórgende osy sózdiń adam boiynda bolatyn qasiet ekenine senesiń.
Myqty ánshi bolýdyń ózi bir ǵumyrǵa jetedi. Jyraýlyqtyń júgin arqalaý – óz aldyna bir taǵdyr. Depýtat bolyp, eldiń sózin aitý – bir azamatqa jetetin júk. Ulttyq sportqa tutas bir dáýir qyzmet etý – taǵy bir ǵumyr. Qairatkerlik, sheshendik, uiymdastyrýshylyq, eldik máselege aralasý – munyń árqaisysy bólek adamnyń mańdaiyna jeke-jeke jazylsa da az qasiet emes edi.
Al osynyń báriniń bir adamnyń boiynan tabylýy - jai sáikestik emes. Allanyń nazary túsip, Ózi qoldamasa, alyp júrý de ońai emes abyroi! Sondyqtan Bekbolat aǵaǵa qatysty pikirdiń ekige jarylýy da zańdy shyǵar. Qundylyqty qadirleitin adam onyń eńbegin kóredi. Ósekke, naýqanǵa, emotsiiaǵa ergish adam oǵan arnalǵan sózdi kóredi. Sonda másele keide Bekbolat aǵada emes, aǵaǵa qaraǵan adamnyń óz ólsheminde bolyp shyǵady…" – dep jazdy Muhamedjan Tazabek.
