Sottalǵan eks-ministr Arystanbek Muhamediulynyń jubaiy Ǵaliia Ysqaqova Prezidentke úndeý joldady, – dep habarlaidy Dalanews.kz.
Burynǵy sheneýniktiń áieli videoda birneshe adamnyń esimin atap, Prezidentten zańsyzdyqty toqtatýdy suraǵan. Negizgi másele "Diplomat" qonaqúiine qatysty bolyp otyr.
Ysqaqovanyń sózinshe, kásipker Serik Qarymsaqov "Diplomat" qonaqúiin satýdan túsken tabysty qaitarmaǵan, ol bul qarjynyń bir bóligin qaryzyn jabýǵa, endi bir bóligin memlekettik múlik satyp alýǵa jumsaǵan.
"Serik Qarymsaqov 2019-2022 jyldar aralyǵynda "Diplomat" qonaqúiin eki qaitara satyp, isine salǵyrt qaraityn sýdialar arqyly qonaqúidi qaitaryp alǵan, biraq túsken milliardtaǵan teńgeni qaitarmady. Bul qonaqúidi Qarymsaqov alǵash ret 2019 jyly 24 mamyrda 2,5 mlrd teńgege satqan. Alaida ol aqshany jumsap tastaǵan soń sotqa qonaqúidi satpaǵanyn aityp shaǵymdanǵan. Sýdia aryzyn qanaǵattandyryp, satyp alýshy Qarymsaqovqa 500 mln teńge qaryz bolǵan", - dedi Ysqaqova.
Ǵaliia Ysqaqova Qarymsaqov munymen toqtamaǵanyn aitady. Ol quramyna "Diplomat" qonaqúii kiretin kompaniiasynyń 71 paiyz úlesin Ysqaqovanyń anasyna satqan kórinedi. Onyń sózinshe, alaida keiin muny da moiyndamai qoiǵan.
"2020 jyly 2 maýsymda "Aqterek LTD" kompaniiasynyń 71 paiyzyn úlesin 2,7 mlrd teńgege anama satqan. Al 2022 jyly Qarymsaqov taǵy sotqa júginip, "Aqterek LTD" JShS-niń 71 paiyzyn satpaǵanyn alǵa tartqan. Al kompaniianyń balansynda "Diplomat" qonaqúii de bolǵan. Astana qalasynyń sýdiasy onyń aryzyn taǵy qanaǵattandyryp, "Aqterek LTD" JShS-niń 71 paiyz úlesi men "Diplomat" qonaqúiin qaitaryp bergen. Biraq Qarymsaqov otbasymyzǵa 2,7 mlrd teńgeni qaitarǵan joq. Ol meniń kúieýime qatysty júrgizilip jatqan sotaldy tergeýdi paidalanyp, ózin jábirlenýshi etip kórsetti", - dedi ol.
Ysqaqova Qarymsaqov bul joly túsken aqshany da qaryzyn, sot shyǵyndaryn jabýǵa, páter satyp alýǵa jumsaǵanyn jetkizdi. Ol keiin aqshany qaitarýdy surap kásipkerge jazbasha hat joldaǵanyn da aitty.
Eks-ministrdiń jubaiy Ǵaliia Ysqaqova bul iske qatysy bar adamdar laiyqty jazasyn alsa eken deidi. Óitkeni, onyń aitýynsha, quzyrly organdarǵa, sotqa túsirgen aryzdary tiisti deńgeide qaralmaǵan.
Bul joly ol Prezidentten Bas prokýratýraǵa, Sybailas jemqorlyqqa qarsy is-qimyl jáne Qarjylyq monitoring agenttikterine, Ishki ister ministrligine bul derekterdi jan-jaqty tekserýdi jáne atalǵan adamdardy qylmystyq jaýapkershilikke tartýdy tapsyrýdy surap otyr.
Arystanbek Muhamediuly - burynǵy mádeniet jáne sport ministri, sondai-aq, Ulttyq mýzeidiń basshysy. 2024 jyly 29 aqpanda ol birneshe qylmystyq bap boiynsha 11 jylǵa bas bostandyǵynan aiyryldy.
Aiyptar arasynda "Altyn adamnyń sherýi" kórmesinde aqsha jymqyrý, laýazymdyq ókilettikti teris paidalaný, "Diplomat" qonaqúiine qatysty reiderlik áreketter jáne para berý áreketi bar.
2024 jyly tamyzda onyń úkimi qaita qaraldy, biraq sot burynǵy sheshimdi ózgerissiz qaldyrdy.
