Ótken demalys kúnderi Braziliiaǵa jumys sapary aiasynda Qazaqstan Respýblikasy Premer-ministriniń orynbasary – Syrtqy ister ministri Murat Nurtileý Embraer, Tramontina, Vale, Marcopolo jáne Amazul syndy tanymal kompaniialardy qosa alǵanda eldiń jetekshi ónerkásiptik birlestikteri men iri korporatsiialarynyń basshylyǵymen birqatar ekijaqty kezdesýler ótkizdi, dep habarlaidy Dalanews.kz.
Braziliia Ulttyq ónerkásip konfederatsiiasynyń prezidenti Rikardo Alban men osy uiymnyń vitse-prezidenti, sondai-aq "Qazaqstan-Braziliia" iskerlik keńesiniń teń tóraǵasy Jilberto Petrimen kezdesý barysynda Qazaqstanmen ekonomikalyq bailanystardy damytýǵa qosqan úlesteri úshin rizashylyq bildirildi jáne ózara is-qimyldy odan ári nyǵaitý joldary talqylandy. Ministr braziliialyq investorlardy Qazaqstan naryǵyna tartýdyń mańyzdylyǵyn atap ótip, aǵymdaǵy jyly elimizde ótetin Iskerlik keńestiń tórtinshi otyrysyna qatysýǵa shaqyrdy.
Tramontina kompaniiasynyń óńirlik direktory Ginter Leandro Brinkmann jaqyn arada Almatyda resmi ókildik ashý josparymen bólisti. Bul qadam – Qazaqstan naryǵyna degen joǵary qyzyǵýshylyqtyń dáleli.
Embraer aviaqurylys korporatsiiasynyń prezidenti Frantsisko Gomes Netomen kezdesýde kompaniianyń óńirdegi qatysýyn keńeitý baǵyttary, onyń ishinde elimizde áýe kemelerine tehnikalyq qyzmet kórsetetin ortalyq ashý múmkindigi qarastyryldy.
Vale taý-ken kompaniiasynyń atqarýshy vitse-prezidenti Sami Arappen suhbat barysynda shikizat salasyndaǵy birlesken jobalardy iske asyrý perspektivalaryn talqylaý úshin Qazaqstanǵa jumys sapary uiymdastyrý jóninde ýaǵdalastyqqa qol jetkizildi. Sonymen qatar kompaniia ókilderi otandyq naryqqa shyǵýǵa qyzyǵýshylyq bildirdi.
Marcopolo vitse-prezidenti Maýro Gilberto Bellinimen avtobýs óndirisin lokalizatsiialaý, onyń ishinde Qazaqstanda jolaýshylar kóligin jinaý jobasy aiasyndaǵy yqtimal seriktestik joldary qarastyryldy.
Amazul memlekettik qorǵanys-ónerkásiptik kompaniia prezidenti Niýton de Almeida Koshta Netomen kezdesýde Qazatomónerkásip ulttyq atom kompaniiasymen tikelei bailanys ornatý máselesine basa nazar aýdaryldy. Kezdesý qorytyndysy boiynsha beibit atom salasyndaǵy ózara is-qimyl mehanizmderin pysyqtaý boiynsha ózara túsinistikke qol jetkizildi.
Kezdesýler barysynda syrtqy saiasi vedomstvonyń basshysy sheteldik kapital úshin Qazaqstannyń quqyqtyq alańynyń tartymdylyǵyn atap ótip, el úkimetiniń sheteldik kompaniialarǵa qajetti qoldaý kórsetýge daiyn ekenin jetkizdi. Geografiialyq ornalasýdyń tiimdiligi, halyqaralyq kólik dálizderine qatysýy jáne ashyq saýda saiasaty otandyq naryq arqyly eksporttyq tizbekterdi keńeitýge múmkindik beretin negizgi faktorlar retinde ataldy.
Sonymen qatar M.Nurtileý Latyn Amerikasynyń kásipkerlerin «Qazaqstan-Braziliia» iskerlik keńesiniń jumysyna belsendi qatysýǵa jáne onyń alańyn ózara ekonomikalyq bailanystardy tereńdetý men birlesken jobalardy iske asyrý úshin paidalanýǵa shaqyrdy.
Sapar aiasynda Braziliianyń jetekshi salalyq birlestikteri men kompaniialarynyń qatysýymen "Braziliia-Qazaqstan: yntymaqtastyq perspektivalary" taqyrybynda dóńgelek ústel ótti. Is-shara barysynda investitsiialyq jáne saýda-ekonomikalyq ózara is-qimyldyń ózekti baǵyttary talqylanyp, qazaqstandyq naryqtyń múmkindikteri tanystyryldy, sondai-aq birqatar ekijaqty memorandýmdarǵa qol qoiyldy.
