Búginde oblys aýmaǵyndaǵy turǵyn úiler men páterlerde 11 410 gaztaldaǵysh qurylǵysy ornatylǵanyn Qoǵamdyq kommýnikatsiia ortalyǵynda ótken brifingte Mańǵystaý oblysy tótenshe jaǵdailar departamentiniń basshysy Murat Muhanov málim etti.
Onyń aitýynsha, gaztaldaǵysh (gazoanalizator) qurylǵylaryn ornatý – tabiǵi gazben ýlanýdyń aldyn alatyn eń tiimdi tásil.
– Turǵyndardyń úiine gaz taldaǵysh qurylǵylaryn ornatý jumystary jalǵasyp jatyr. Jergilikti biýdjetten 800-ge jýyq arnaiy qurylǵy satyp alyndy. 200 gaztaldaǵysh Beineý aýdanynda, taǵy 300 Túpqaraǵan aýdanynda qondyrylǵan. Qosymsha 300 qurylǵyny Qaraqiia aýdanynyń turǵyn úilerine ornatý josparlanyp otyr, – dedi Murat Muhanov.
Jýrnalistermen júzdesken Murat Muhanov biyl Mańǵystaý oblysynda jyl basynan 44 órt tirkelgenin alǵa tartty. Onyń aitýynsha, órt barysynda 5 adam qutqarylyp, 168 adam evakýatsiialanǵan.
Órt nátijesinde 1 adam qaza taýyp, 1 adam jaraqat aldy. Al ýly gazdan ýlaný saldarynan 2 adam qaza taýyp, 2 adam jaraqat aldy. Turǵyn úi sektorynda 17 órt oqiǵasy, avtokólikte 15 órt oqiǵasy tirkeldi.
– Jylytý maýsymyna daiyndyq kezeńinde oblystyq tótenshe jaǵdailar departamenti jergilikti atqarýshy organdarmen birlesip, áleýmettik osal toptaǵy 3 myńnan astam úidi esepke aldy. Tiisti mamandar úilerdi aralap, reid júrgizdi. Tekseris nátijesinde 625 úide 749 órt qaýipsizdigi talaptarynyń buzýshylyqtary anyqtalyp, sol jerde joiyldy, – dedi departament basshysy.
