بٷگٸندە وبلىس اۋماعىنداعى تۇرعىن ٷيلەر مەن پەتەرلەردە 11 410 گازتالداعىش قۇرىلعىسى ورناتىلعانىن قوعامدىق كوممۋنيكاتسييا ورتالىعىندا ٶتكەن بريفينگتە ماڭعىستاۋ وبلىسى تٶتەنشە جاعدايلار دەپارتامەنتٸنٸڭ باسشىسى مۇرات مۇحانوۆ مەلٸم ەتتٸ.
ونىڭ ايتۋىنشا, گازتالداعىش (گازواناليزاتور) قۇرىلعىلارىن ورناتۋ – تابيعي گازبەن ۋلانۋدىڭ الدىن الاتىن ەڭ تيٸمدٸ تەسٸل.
– تۇرعىنداردىڭ ٷيٸنە گاز تالداعىش قۇرىلعىلارىن ورناتۋ جۇمىستارى جالعاسىپ جاتىر. جەرگٸلٸكتٸ بيۋدجەتتەن 800-گە جۋىق ارنايى قۇرىلعى ساتىپ الىندى. 200 گازتالداعىش بەينەۋ اۋدانىندا, تاعى 300 تٷپقاراعان اۋدانىندا قوندىرىلعان. قوسىمشا 300 قۇرىلعىنى قاراقييا اۋدانىنىڭ تۇرعىن ٷيلەرٸنە ورناتۋ جوسپارلانىپ وتىر, – دەدٸ مۇرات مۇحانوۆ.
جۋرناليستەرمەن جٷزدەسكەن مۇرات مۇحانوۆ بيىل ماڭعىستاۋ وبلىسىندا جىل باسىنان 44 ٶرت تٸركەلگەنٸن العا تارتتى. ونىڭ ايتۋىنشا, ٶرت بارىسىندا 5 ادام قۇتقارىلىپ, 168 ادام ەۆاكۋاتسييالانعان.
ٶرت نەتيجەسٸندە 1 ادام قازا تاۋىپ, 1 ادام جاراقات الدى. ال ۋلى گازدان ۋلانۋ سالدارىنان 2 ادام قازا تاۋىپ, 2 ادام جاراقات الدى. تۇرعىن ٷي سەكتورىندا 17 ٶرت وقيعاسى, اۆتوكٶلٸكتە 15 ٶرت وقيعاسى تٸركەلدٸ.
– جىلىتۋ ماۋسىمىنا دايىندىق كەزەڭٸندە وبلىستىق تٶتەنشە جاعدايلار دەپارتامەنتٸ جەرگٸلٸكتٸ اتقارۋشى ورگاندارمەن بٸرلەسٸپ, ەلەۋمەتتٸك وسال توپتاعى 3 مىڭنان استام ٷيدٸ ەسەپكە الدى. تيٸستٸ ماماندار ٷيلەردٸ ارالاپ, رەيد جٷرگٸزدٸ. تەكسەرٸس نەتيجەسٸندە 625 ٷيدە 749 ٶرت قاۋٸپسٸزدٸگٸ تالاپتارىنىڭ بۇزۋشىلىقتارى انىقتالىپ, سول جەردە جويىلدى, – دەدٸ دەپارتامەنت باسشىسى.
