Almatyda Naýryzbai aýdandyq soty aqyn Muqaǵali Maqataevty qorlady dep aiyptalǵan bloger Álisher Temenovke qatysty qylmystyq isti toqtatty, dep habarlaidy Dalanews.kz Orda.kz-ke silteme jasap.
Ol Qylmystyq kodekstiń 131-baby 2-bóligi boiynsha («Qorlaý») jaýapqa tartylǵan bolatyn. Isti sýdia Beinekúl Qaisina qarady.
Sot búgin, 16 maýsymda ótti. Jábirlenýshi - aqynnyń uly Juldyz Maqataev - blogerdi keshirip, isti toqtatýdy surady. Buǵan deiin ol moraldyq shyǵyn retinde on million teńge ótemaqy talap etken edi.
Sotta Temenov kinásin tolyq moiyndap, keshirim surady. Ol eki taraptyń kelisimge kelgenin aityp, isti qysqartýdy surady.
«Kinámdi moiyndaimyn, keshirim suraimyn. Qazir ózimmen eki million teńge alyp keldim. Qalǵan bir millionyn on kún ishinde jetkizemin. Osy ýaqyt ishinde kóligimniń kiltin kepil retinde qaldyramyn. Qalǵan aqshany ákelgen soń, kóligimdi qaita alamyn», – dedi ol sotta.
Sýdia sheshim qabyldaýǵa ketken sátte bloger jábirlenýshige eki million teńgeni qolma-qol berip, kóliginiń kiltin de tabystady.
Nátijesinde, sot taraptardyń tatýlasýyna bailanysty isti toqtatyp, Temenovti qylmystyq jaýapkershilikten bosatty. Azamattyq talap ta qysqartyldy.
Alaida sot blogerge qatysty «eshqaida ketpeý jáne tiisti minez-qulyq týraly qolhat» túrindegi bultartpaý sharasyn kúshinde qaldyrdy.
Budan bólek, Álisher Temenov áleýmettik jelide Muqaǵali Maqataevty balaǵattaǵany úshin halyqtan beineúndeý arqyly keshirim suraýǵa ýáde etti.
Aita keteiik, blogerge qatysty shaǵymdy aqynnyń uly Juldyz Maqataev túsirgen. 2023 jylǵy 8 qazanda Temenov áleýmettik jelide Muqaǵali Maqataevqa qatysty balaǵat sózder aitylǵan beinejazba jariialaǵan bolatyn. Sol úshin aqynnyń uly moraldyq ótemaqy retinde 10 million teńge talap etken.
