الماتىدا ناۋرىزباي اۋداندىق سوتى اقىن مۇقاعالي ماقاتايەۆتى قورلادى دەپ ايىپتالعان بلوگەر الىشەر تەمەنوۆكە قاتىستى قىلمىستىق ءىستى توقتاتتى، دەپ حابارلايدى Dalanews.kz Orda.kz-كە سىلتەمە جاساپ.
ول قىلمىستىق كودەكستىڭ 131-بابى 2-بولىگى بويىنشا («قورلاۋ») جاۋاپقا تارتىلعان بولاتىن. ءىستى سۋديا بەينەكۇل قايسينا قارادى.
سوت بۇگىن، 16 ماۋسىمدا ءوتتى. جابىرلەنۋشى - اقىننىڭ ۇلى جۇلدىز ماقاتايەۆ - بلوگەردى كەشىرىپ، ءىستى توقتاتۋدى سۇرادى. بۇعان دەيىن ول مورالدىق شىعىن رەتىندە ون ميلليون تەڭگە وتەماقى تالاپ ەتكەن ەدى.
سوتتا تەمەنوۆ كىناسىن تولىق مويىنداپ، كەشىرىم سۇرادى. ول ەكى تاراپتىڭ كەلىسىمگە كەلگەنىن ايتىپ، ءىستى قىسقارتۋدى سۇرادى.
«كىنامدى مويىندايمىن، كەشىرىم سۇرايمىن. ءقازىر وزىممەن ەكى ميلليون تەڭگە الىپ كەلدىم. قالعان ءبىر ميلليونىن ون كۇن ىشىندە جەتكىزەمىن. وسى ۋاقىت ىشىندە كولىگىمنىڭ كىلتىن كەپىل رەتىندە قالدىرامىن. قالعان اقشانى اكەلگەن سوڭ، كولىگىمدى قايتا الامىن»، – دەدى ول سوتتا.
سۋديا شەشىم قابىلداۋعا كەتكەن ساتتە بلوگەر جابىرلەنۋشىگە ەكى ميلليون تەڭگەنى قولما-قول بەرىپ، كولىگىنىڭ كىلتىن دە تابىستادى.
ناتيجەسىندە، سوت تاراپتاردىڭ تاتۋلاسۋىنا بايلانىستى ءىستى توقتاتىپ، تەمەنوۆتى قىلمىستىق جاۋاپكەرشىلىكتەن بوساتتى. ازاماتتىق تالاپ تا قىسقارتىلدى.
الايدا سوت بلوگەرگە قاتىستى «ەشقايدا كەتپەۋ جانە ءتيىستى مىنەز-قۇلىق تۋرالى قولحات» تۇرىندەگى بۇلتارتپاۋ شاراسىن كۇشىندە قالدىردى.
بۇدان بولەك، الىشەر تەمەنوۆ الەۋمەتتىك جەلىدە مۇقاعالي ماقاتايەۆتى بالاعاتتاعانى ءۇشىن حالىقتان بەينەۇندەۋ ارقىلى كەشىرىم سۇراۋعا ۋادە ەتتى.
ايتا كەتەيىك، بلوگەرگە قاتىستى شاعىمدى اقىننىڭ ۇلى جۇلدىز ماقاتايەۆ تۇسىرگەن. 2023 جىلعى 8 قازاندا تەمەنوۆ الەۋمەتتىك جەلىدە مۇقاعالي ماقاتايەۆقا قاتىستى بالاعات سوزدەر ايتىلعان بەينەجازبا جاريالاعان بولاتىن. سول ءۇشىن اقىننىڭ ۇلى مورالدىق وتەماقى رەتىندە 10 ميلليون تەڭگە تالاپ ەتكەن.
