Gúljan shýly jazbasyn óshirgennen keiin «bizde halyq shyndyqty aitsań osylai jazǵyrady» dep renjipti.
Orynsyz oi
Kezinde jýrnalynyń jarnamasyn jasaý úshin tyrdai jalańash sheshinip, jurt aldyna shyqqan apamyzdyń sońǵy jazbasynan áleýmettik jelige neni jazyp, neni jazbaý keregin áli túsinbegenin baiqadyq.
Shýly jazbany mazmuny tómendegidei. Apamyz bir jerge barý úshin taksi ustap, bir orystyń taza, jaily máshinesimen yrǵalyp-jyrǵalyp dittegen jerine jetip alypty. Al qaitarda bir qazaqtyń ishi las, Qairat Nurtastyń ánin «baqyrtyp» qoiǵan kólikpen úiine áreń jetipti.
Apamyz qazaq taksistiń eshteńe oqymaǵanyn, eshteńege qyzyqpaitynyn, Dimash Qudaibergen jaiynda múlde bilmeitinin baiqapty (apa, senimdi bolýyńyz úshin surai salýyńyz kerek edi).
Tipti,eshteńe oilamaityn qazaq taksistiń «qazaqtar orystardy tunshyqtyrýy kerek» dep oilaitynyn ańdap qalypty. Osylaisha apamyz jol boiy kókeige túigen oilaryn úiine kelgen soń, Feisbýkqa tópeletip jazyp tastaǵan ǵoi.
Erǵalieva qazaqtar jaiynda ne oilaidy?
Erǵalieva osy posty jazǵanda aýyldan shyqqan qazaqtar (Gúlekeńe qatysy joq adamdar) renjidi-aý dep nege oilamady?
Demek Erǵalieva oilanbaityn saiasatker boldy ǵoi. Sonda onyń bilikti synap, halyqtyń soiylyn soǵyp júrgeniniń bári beker bolǵany ma?
Gúljan apamnyń qazaq taksisttiń nelikten mundai kúige túskenin bilmedi dep aitýǵa aýyzyń barmaidy. Eger shynymen bilmese,aitaiyq.
Osy bir jazbadan-aq, Erǵalievanyń halyq úshin, qazaq tili úshin jany aýyrmaityn, oiynshyq oppozitsioner ekenin baiqaǵandai boldyq. Tipti, myna jazbasynan keiin apamyzdy oppozitsioner degennen góri «saiasi saýdager» dep ataǵan durys pa dep qaldyq.
Qazir Astana men Almatynyń kóshelerinde qý tirshiliktiń qamymen júrgen aýyldan kelgen taksistterdi kóptep kezdestirýge bolady. Páter jaldap, bala-shaǵany qalai asyraimyn dep júrgen aýyl qazaǵynyń jol boiynda qol kóterip, kóligine mingen Ergalievaǵa «qandai mýzyka tyńdaisyz» dep syzylyp turatyn jaiy bar ma? Árine joq.
Eger orys taksist «mýzyka qosaiyn ba?» dep sypailyq tanytsa, onyń jaǵdaiy jaqsy bolǵany... Úrim-butaǵymen osy Almatyda turatyn adamdy jaǵdaiy joq dep eshkim aita almasy anyq. Almatydaǵy orystardyń baspana degen bálemen bas aýyrtpaǵanyn bárimiz bilemiz. Tórt qubylasy túgel. Jumysy bar.
Mádeniettiń ólshemi...
Al Gúljan apamyzdyń turmys taýqymetin tartyp júrgen qazaq taksisten joǵary mádenietti talap etetindei qandai moraldyq qaqysy bar? Eshqandai qaqysy joq. Ańqaý aýyl qazaǵynyń mádenieti kemshin túsip jatsa, oǵan bilik, qala berdi óz qazaǵyna jyly qabaq tanytpaityn tasbaýyr orystildi qazaqtar kináli.
Aitpaqshy, apamyz óz jazbasynda «Qairat Nurtastyń ánin baqyrtyp qoiypty» dep kekegeni janymyzǵa batty.
Qairat Nurtasty Erǵalieva tyńdamaidy eken dep barsha qazaq sizdiń talǵamyńǵyz boiynsha án tyńdaýy kerek pe?
Qurmetti Gúljan apa, bilip qoiyńyz, qazaq tilinde án salyp, qalyń qazaqtyń qoshemetine bólingen Qairat Nurtas degen balańyz qazaqtyń shoý-biznesin damytyp júrgen maitalman ánshilerdiń biri. Sondyqtan ózin mádenietti sanaityn qazaqtar Qairat Nurtasty tyńdaidy.
Kerisinshe «Qairat Nurtasty baqyrtyp qoiypty» dep ózińizdiń qazirgi qazaqtyń mýzyka mádenietinen habaryńyz joq ekenińizdi baiqatyp qoidyńyz.
Sonymen qatar álgi eshteńege qyzyqpaityn taksistiń Dimash Qudaibergendi bilmeitinin úlken kemshilik retinde aitypsyz. Iá, Dimash úlken talant iesi. Ony mýzykalyq bilimi bar mamandar kúndelikti tyńdaýy múmkin.
Al qarapaiym adamnyń Dimashty kúndelikti tyńdamaityny anyq. Gúljan apa, sizge salsa Almatynyń taksisteriniń bárine aq jeide men qara frak kigizip, Dimashtyń ánin áýeletip árbir klienttiń aldynda múnáiim bolǵanyn qalaisyz-aý.
Apa-aý, ony Qazaqstannyń jaǵdaiy kótere me? Ony ózińiz aitarsyz.Oiyńyzǵa kelgen osy bir oidy usynys hat retinde joǵaryǵa jazbadyńyz ba?
Endi samaiyńyzdy qyraý shalǵanda oilanbai post jazyp, jazbańyzdy Feisbýktan qaita óshirip, bes jasar balanyń deńgeiine túsip otyrsyz. Álde bilikpen kúresip kárteidińiz be, apa?!
Nurlan JUMAHAN, jýrnalist
https://dalanews.kz/8927
