Moldova biligi Táýelsiz Memleketter Dostastyǵynan (TMD) shyǵý rásimin resmi túrde bastap ketti. Kishinev eldiń TMD-ǵa músheliginiń negizin quraityn úsh negizgi kelisimdi denonsatsiialaý protsesin qolǵa alǵan, dep habarlaidy Dalanews.kz.
Bul jóninde Moldovanyń syrtqy ister ministri Mihai Popshoi Radio Moldova radiosynyń efirinde málimdegen. Onyń aitýynsha, bul kelisimderdiń kúshi joiylǵannan keiin Moldova zańdy ári resmi turǵyda TMD quramynan shyǵady. Ministrdiń sózinshe, eldiń dostastyqtaǵy músheligi biraz ýaqyt buryn-aq toqtatylǵan.
Denonsatsiialanatyn qujattar qatarynda 1993 jylǵy 22 qańtarda Minskide qabyldanǵan TMD jarǵysy, 1991 jylǵy 8 jeltoqsanda qol qoiylǵan TMD-ny qurý týraly kelisim jáne sol kelisimge 1991 jylǵy 22 jeltoqsanda bekitilgen qosymsha bar.
Mihai Popshoi protsess qazirdiń ózinde júrip jatqanyn aityp, Parlament depýtattary bul qujattardy jańa sessiianyń basynda qarastyratynyn jetkizdi. Onyń boljamynsha, Úkimettegi rásimder aqpannyń ortasyna qarai aiaqtalyp, sońǵy sheshim Parlamentte qabyldanady.
Syrtqy ister ministri bul qadamdy Moldovanyń eýropalyq baǵyttaǵy saiasatyn nyǵaitýdyń mańyzdy kezeńi dep atady.
