Meta kompaniiasy Trampqa paraqshalaryn buǵattaǵany úshin 25 million dollar tóleidi, dep habarlaidy Dalanews.kz.
Tramp Meta-ny ózin Facebook pen Instagram jelilerinde ádiletsiz buǵattady dep aiyptap, 2021 jylǵy 6 qańtarda Kapitoliige shabýyldan keiin áleýmettik jelilerdi tsenzýraǵa synǵa alǵan bolatyn. Kompaniianyń basshysy Mark Tsýkerberg jaqynda Trampty qoldap pikir bildirip, Meta qosymshalarynda (onyń ishinde Facebook, Instagram, Threads jáne WhatsApp) sóz bostandyǵyn keńeitýge baǵyttalǵan kompaniia saiasatyna úlken ózgerister engizdi. Sonymen qatar, ol ártúrlilikke qatysty bastamalardy toqtatty.
Tórtinshi toqsannyń qarjylyq nátijeleri týraly investorlarmen telefon arqyly ótken konferentsiia kezinde Tsýkerberg Tramp ákimshiliginiń amerikalyq tehnologiialyq kompaniialardy qoldaýda jáne “bizdiń qundylyqtarymyzdy qorǵaýda” mańyzdy ról atqarǵanyn aitty.
“Bul – úkimetpen qarym-qatynasymyzdy qaita qaraý úshin mańyzdy jyl bolady”, – dedi Mark Tsýkerberg.
Kelisimniń sharttaryna sáikes, 22 million dollar Tramptyń prezidenttik kitaphanasyn qarjylandyrýǵa jumsalady, al qalǵan 3 million sot isimen bailanysty shyǵyndardy jabady. Sonymen qatar, Meta kelisim aiasynda óz kinásin moiyndamaǵanyn atap ótti.
