Aitys óneriniń aibary, ulttyq rýhaniiattyń janashyry, kórnekti qalamger ári qoǵam qairatkeri Júrsin Erman Memleket basshysy Qasym-Jomart Toqaev qol qoiǵan Jarlyqqa sáikes «Qazaqstannyń Halyq jazýshysy» qurmetti ataǵyna ie boldy, dep habarlaidy Dalanews.kz
Joǵary marapat aqynnyń ulttyq ádebiet pen aitys ónerin damytýǵa, qazaq rýhaniiatynyń kókjiegin keńeitýge sińirgen eren eńbegi úshin tabystaldy. Qasietti ónerdiń qadirin arttyryp, aitysty jańa deńgeige kótergen Júrsin Ermannyń shyǵarmashylyq joly – tutas bir dáýirdiń shejiresi.
Qurmetti ataq aqynnyń 75 jasqa tolǵan mereitoiyna orai uiymdastyrylǵan saltanatty jiynda arnaiy tapsyryldy. Memlekettik marapatty Almaty qalasynyń ákimi Darhan Satybaldy aqynǵa erekshe iltipatpen tabys etip, onyń ult rýhaniiatyna qosqan ólsheýsiz úlesin atap ótti. Bul – qalamgerge kórsetilgen qurmettiń aiqyn kórinisi.
Mereitoi keshinde taǵy bir áserli sát oryn aldy. Ustazynyń ónegesin kórip ósken shákirtteri Júrsin Ermanǵa zor alǵystyń belgisi retinde avtokólik syilady. Bul – aitys mektebin qalyptastyryp, talai jas aqynnyń tusaýyn kesken ustazǵa degen shynaiy qurmet pen yqylastyń belgisi.
Aita keteiik, buǵan deiin Júrsin Erman «Qazaqstannyń eńbek sińirgen qairatkeri» ataǵyna ie bolyp, Qazaqstan Jazýshylar odaǵy taǵaiyndaityn Muqaǵali Maqataev atyndaǵy syilyqpen eki márte marapattalǵan.
Júrsin Erman – aitys óneriniń qaita jańǵyrýyna ólsheýsiz úles qosqan tulǵa. Onyń uiymdastyrýshylyq eńbegi men shyǵarmashylyq qýaty qazaq mádenietiniń altyn qorynda máńgi saqtalary sózsiz.
