«Meniń Qazaqstanym» oblystyq án baiqaýy bastaldy
Oblystyq mádeniet jáne tilderdi damytý basqarmasy, oblystyq mádeniet jáne halyq shyǵarmashylyǵy ortalyǵynyń uiymdastyrýymen ótken baiqaý Elbasy N.Á.Nazarbaevtyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasyn júzege asyrý, Astananyń 20 jyldyǵyna arnalyp otyr.
Baiqaýdyń maqsaty – kompozitor Shámshi Qaldaiaqovtyń shyǵarmalaryn dáripteý, halyq arasynda án ónerin damytý, qazaq ánderin oryndaýshylar arasynan jas talant ielerin anyqtap kásibi baǵdar berý, jeke shyǵarmashyl tulǵalardyń qalyptasýyna yqpal etý, ánshilerdiń oryndaý sheberlikterin arttyra otyryp olarǵa qoldaý kórsetý jáne otansúigishtikke baýlý, ulttyq rýhta tárbieleý bolyp tabylady.
Baiqaýdyń birinshi kezeńinde úmitkerler Sh.Qaldaiaqovtyń, ekinshi kezeńde Túrkistan oblysy kompozitorlarynyń ánderin shyrqady. Syrly ánmen qazaq halqynyń bitim-bolmysyn, shynaiy beinesin sipattap, án áleminde airyqsha ornyn qaldyrǵan uly kompozitor atyn ulyqtaityn dástúrli óner dodasynyń aýdan, qalada ótken birinshi kezeńine 200-ge jýyq úmitker ótinish bildirip, onyń ishinen 56 úmitker oblystyq baiqaýǵa joldama alǵan bolatyn. Óner báigesine 15 - 29 jas aralyǵyndaǵy úmitkerler qatysty.
Qazaqtyń mýzyka ónerinde Shámshiniń orny erekshe 300-ge jýyq ánderi bar. Baiqaýdyń biylǵy jetistigi uly kompozitordyń oryndalmai júrgen 15-ten asa áni jaryqqa shyǵarylyp, arnaiy aspaptardyń súiemeldeýimen kórermenge jol tartty. Olardyń qatarynda «Kel, Býrabaiǵa», «Baiqońyr», «Kelin keldi», «Kókkóldegi keshter-ai», «Egiz maqta», «Ǵashyq kúnder» jáne Abai Qunanbaevtyń sózine jazylǵan "Tyńda meni, dostarym" syndy ánder bar.
1992 jyldan beri dástúrge ainalǵan bul baiqaýdan elimizge tanymal Shakizada Baibatjanova, Qurman Shoiynbaev, Sáýle Jeldibaeva, Marat Áitimov, Nurǵali Turlybekov, Hadisha Seiitova, Jubanysh Jeksenuly, Gúljazira Qaiyrbekova, Toqtar Serikov, Asqar Júnisbekov, «Jigitter» kvarteti, Nurjan Júsipbekov, Mádihan Dúiseev, Ahynbekov Rýslan, «Saryn» toby syndy óner ieleri qanat qaqqan.
Uly tulǵanyń biregei óner jolyn dáripteýge arnalǵan baiqaýǵa qatysqan 21 ónerpaz aqtyq kezeńge joldama aldy. «Meniń Qazaqstanym» oblystyq án baiqaýynyń qorytyndy dodasy aǵymdaǵy jyldyń 15 tamyz kúni Sh.Qaldaiaqov atyndaǵy oblystyq filarmoniiada, jeńimpazdardy marapattaý jáne gala-kontsert keshki saǵat 19:00-de «Túrkistan» saraiynda ótedi.
