Iakýt mýzykanty ári azamattyq belsendi Aihal Ammosovty dúisenbi kúni Qazaqstanda belgisiz bireýler urlap áketken.
Saha táýelsizdigi úshin "Qarsylyq" qozǵalysynyń málimdeýinshe, azamattyq kiimdegi adamdar ony kólikke otyrǵyzyp, belgisiz baǵytqa alyp ketken. Sodan beri habar joq.
Ammosovtyń tanystary Sota basylymyna sońǵy kúnderi oǵan Qazaqstannyń quqyq qorǵaý organdary ókilderi jii kelip júrgenin aitqan. Olardyń aitýynsha, politsiia qyzmetkerleri Ammosovqa ýaqytsha turýǵa kómektesip júrgen adamǵa baryp, turatyn jeri týraly qyzyǵýshylyq tanytqan. Belsendiniń ózi Astanada tirkelgen, biraq sońǵy kezde Almatyda turyp jatqan.
Aihal "Azat Iakýtiia" qozǵalysynyń irgesin qalaýshy. Ata-anasynyń azan shaqyryp qoiǵan aty - Igor. Eseie kele túr-tulǵasynyń Igorekpen múlde úilespeitinin, munyń zorlyqpen tańǵan esim ekenin túsingen. Aihal saha tilinde áidik, áigili degen maǵyna beredi.
Iakýt belsendisi týraly reportaj jasaǵan DALA INSIDE telegram arnasy: "Iakýtiiadaǵy azattyq simvolyna ainalyp úlgergen Ammosov "orys álemimen" aqyryna deiin arpalysýǵa bel býyp otyr" dep habarlaǵan edi.
Ammosov orystandyrý saiasatynyń zardaby iakýt halqynyń súiegine ótip ketkenin aitqan bolatyn.
"Soǵystan qashqan iakýttardyń kópshiligi Qazaqstandy panalady. Munda kelgennen keiin ózimizdiń máńgúrt ekenimizdi túsindik.
Resei bizdi qoidai órgizip, qozydai kógendegen eken. Sóz saptaýymyz, júris-turysymyz, isher as, kier kiimimizge deiin orystyń isi sińipti. Iakýt kóshelerinde men sekildi "Igor" men "Ivandar" órip júr. Olar bul esimderdi basqynshylardyń kúshpen tańǵanyn bilgisi de kelmeidi...", - dep qynjylǵan Aihal edi.
Tolyq nusqasy osy jerde: https://t.me/dalainside/1280
