Budan buryn habarlaǵanymyzdai, 6 qarasha kúni «Azamat» qozǵalysynyń teń tóraǵasy Murat Áýezov Almatydaǵy Demokratiia úiinde arnaýly baspasóz máslihatyn ótkizip, jinalǵan shetel jáne otandyq baspasóz ókilderi aldynda óziniń saiasi málimdemesin jariia etti.
Baspasóz máslihatyna birqatar saiasi partiialar men qozǵalystardyń ókilderi qatysty.
Óz málimdemesin Murat Áýezov «Qazaqstanda jańa prezidenttik sailaý ótkizý qajettigi jáne ózimdi osy orynǵa úmitker retinde usynýym týraly» dep ataǵan.
Ol jańa prezidenttik sailaý ótkizý qajettigin eldiń damýyna zardap keltirip otyrǵan bir adamnyń jeke-dara bilik qurýyna tosqaýyl qoiyp, konstitýtsiialyq zańdylyqty, demokratiia men áleýmettik ádildikti qalpyna keltirý úshin asa qajet saiasi naýqan dep esepteidi.
Sol úshin de ózin memlekettegi osy joǵary orynnan úmitker retinde jariialaidy. Murat Áýezov óziniń negizgi tuǵyrnamasyn jariialamas buryn málimdemesiniń bas jaǵynda Qazaqstannyń qazirgi saiasi-ekonomikalyq jáne áleýmettik jaǵdaiyna toqtalyp ótken.
Nursultan Nazarbaevtyń on jylǵa sozylǵan shekteýsiz bilik qurý kezeńinde úsh ret – Konstitýtsiia, úsh ret – Parlament, tórt ret Úkimet ózgerdi.
Osy jyldar ishinde halyqtyń ál-aýqat dárejesi jaǵynan jer júzindegi 33 orynnan 93 orynǵa qarai syrǵydy. Óziniń 60 protsent óndiristik qýatynan airyldy. Ólimniń kóbeiip, ósimniń azaiýyna bailanysty jáne syrtqa qonys aýdarýshylardyń kóbeiip ketýin qosqanda, Qazaqstan óz turǵyndarynyń tórtten birinen airyldy.
