Oljasty Oljabaidyń urpaǵy bolǵany úshin jáne Sovet zamanynda «Az i Ia»-ny jazǵany úshin qatty qasterleitinmin. Leningrad kitaphanasynyń móri basylǵan, órtelgen «Az i Ia» kitabynyń kúreń tyspen qaptalǵan bir danasyn KGB men NAHIa-dan jasyryp, Qurandai saqtaitynmyn. 1979 jyly Mońǵoliia dalasyna baryp (KGB jansyzdaryn «ertip»!), Tonykóktiń basyndaǵy tas jazýdy oqyp, kózin dymdaǵanyna sengenmin. Sodan keiin Oljas pen Oljabaidy qasterlep, ekinshi ulymnyń atyn judyryqtasýdan Aziia jeńimpazy Olzbai /Oljabai/-ǵa «Oljas» dep qoidyryp, aýzyna túkirtkenmin. Mońǵoldar meni «Mońǵoliianyń Oljasy» dep qadirleitini úshin Oljastyń jolyn bek ustanǵanmyn.
Myna Astana tórine qoiylǵan, Óvórhanǵaida qorǵaýǵa alynǵan Túrik eskertkishterin qorǵaýdy Mońǵoliiada alǵash qolǵa alyp, jobasyn jasaǵanmyn. Sol joba boiynsha Mońǵoliia Mádeniet ministri Nambaryn Enhbaiar 1995 jyly Túrik-Mońǵol kelisimine qol qoiǵan. Derekter saqtaýly. Ári dosym, Mońǵoliianyń eks-prezidenti Nambaryn Enhbaiar Oljasty Nursultan qalai qasterlese, meni dál solai qasterleidi. Ókinishtisi, men «oralman» ataýyn alǵaly beri Nurekeń meni adam, aqyn dep aldyna bir shaqyrmady, qorǵaýshylary Sizge ashylǵan esikti maǵan ashpady... (Múmkin ol kisige men týraly aqparat basqa qyrynan jetip jatqan da bolar!)
Oljas – «orys», Men – «mońǵol» bolǵanym ras. Sol sebepti, Oljas neni jasasa, men sony jasadym. Ol orys tilinde jaqsy óleń jazsa, men mońǵol tilinde jaqsy óleń jazdym. Ol «Igor jasaǵyna» túsindirme jazsa, men «Altyn tobshyny» qazaq tiline aýdaryp, túsindirme jazdym. Ol «Myń bir sózdi» jazsa, Men «Kóshpendiler tarihyn kóne tańbalar arqyly zertteýdi» qazaq tiline aýdardym. Bunyń arasyndaǵy Abaidan bastap Aqberenge deiingi aqyndar óleńderiniń aýdarmasy – bólek áńgime! /J.H/.
Ol Elimizdiń táýelsizdigin qalasa, Men ejelgi Túrik dalasyn tastap, Atajurtyma alǵashqy bop, kósh bastap keldim...
Arada eki múshel ótipti.
Men Oljasty sol baiaǵy Oljas dep oilap júrdim.
Sol oidyń jeteginde Atajurtqa kelgen kúnnen bastap, ana tilimdi úirenip, ana tilimde jazýǵa kóshtim. Bógde til – mońǵolshany tastap, qazaqsha óleń jazdym. Qatty qinaldym, úirendim, tarshylyq kórdim. Áli kúnge deiin kórip kelemin!.
Al, men sengen, men qasterlegen Oljas aǵam osy aralyqta qazaq tilin úirenip, qazaqty qasterleýi qurysyn, Ózi aljasqanymen qoimai, Meni de qosa aljastyryp kelgen eken!..
Endi, eger, qai bir prezident dosym meni qabyldar bolsa, Men dál osy oiymdy aityp, aǵamdy da, oǵan aldanǵan elimniń myna shynaiy bolmys, shynaiy tirligin de sýrettep beremin.
Óitkeni, Tildi – bastaǵy mimen jónge salýǵa bolady. Al, júrekke eshqashan ámir júrmeidi.
Oljas Omaruly Súleimenov aǵa!
Men Sizge eliktep, qatty aljasqan ekenmin.
Endi Siz de midaǵy emes, Júrektegi ámirge, Qazaq ultynyń degenine tabynyńyz!!!
Izgi nietten Mońǵolda tárbielengen inińiz, aqyn, aýdarmashy Júkel QAMAIULY.
