Túrkistan oblysynyń Sıfrlandyrý, memlekettik qyzmetter kórsetý jáne arhıvter basqarmasy men Qoja Ahmet Iasaýı atyndaǵy HQTÝ arasynda ózara yntymaqtastyq memorandýmy túzildi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Atalǵan kelisimge Sıfrlandyrý, memlekettik qyzmetter kórsetý jáne arhıvter basqarmasy basshysy Marat Aınabekov pen rektor ókili Nadjı Gench qol qoıdy.
Bul kelisim óńirdegi bıznes-ınkýbator, ınovasıa jáne tehnologıalyq kásipkerlik salasynda yntymaqtastyq ornatýǵa, İT salasynyń órkendeýine yqpalyn tıgizbek.
Sondaı-aq, sıfrlandyrý salasynda naqty jobalardyń júzege asýyna, stýdentterdiń taǵylymdamalardan ótýine, hakatondar men praktıkalyq jumystar arqyly bilimderin nyǵaıtýǵa úlken múmkindik bolmaq.
Kelisimshart aıasynda stýdentterdi tehnologıalyq bıznes-ıdeıalar men jobalardy qurýǵa arnalǵan birlesken is-sharalar, leksıa men semınarlar, startap demalys kúnderi ótedi. Jastar arasynda baıqaýlar men bıznes-jobalardyń jármeńkesin ótkizip, ınovasıalyq baǵyttaǵy úzdik bıznes jobalardy irikteý arqyly olardy júzege asyrýǵa qoldaý kórsetilmek.
Memorandým barysynda basqarma basshysy Marat Farıtuly halyqaralyq dárejedegi ýnıversıtetpen yntymaqtastyq kelisimi ornaǵanyna qýanyshty ekenin, stýdentterdiń kásibı daǵdylaryn damytýda jáne jumysqa ornalasý múmkindikterin keńeıtýde basqarma tarapynan qoldaýlar kórsetiletinin jetkizdi.
