تۇركىستان وبلىسىنىڭ سيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسى مەن قوجا احمەت ياساۋي اتىنداعى حقتۋ اراسىندا ءوزارا ىنتىماقتاستىق مەموراندۋمى ءتۇزىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
اتالعان كەلىسىمگە سيفرلاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسى باسشىسى مارات اينابەكوۆ پەن رەكتور وكىلى نادجي گەنچ قول قويدى.
بۇل كەلىسىم وڭىردەگى بيزنەس-ينكۋباتور، يننوۆاسيا جانە تەحنولوگيالىق كاسىپكەرلىك سالاسىندا ىنتىماقتاستىق ورناتۋعا، ءىت سالاسىنىڭ وركەندەۋىنە ىقپالىن تيگىزبەك.
سونداي-اق، سيفرلاندىرۋ سالاسىندا ناقتى جوبالاردىڭ جۇزەگە اسۋىنا، ستۋدەنتتەردىڭ تاعىلىمدامالاردان وتۋىنە، حاكاتوندار مەن پراكتيكالىق جۇمىستار ارقىلى بىلىمدەرىن نىعايتۋعا ۇلكەن مۇمكىندىك بولماق.
كەلىسىمشارت اياسىندا ستۋدەنتتەردى تەحنولوگيالىق بيزنەس-يدەيالار مەن جوبالاردى قۇرۋعا ارنالعان بىرلەسكەن ءىس-شارالار، لەكسيا مەن سەمينارلار، ستارتاپ دەمالىس كۇندەرى وتەدى. جاستار اراسىندا بايقاۋلار مەن بيزنەس-جوبالاردىڭ جارمەڭكەسىن وتكىزىپ، يننوۆاسيالىق باعىتتاعى ۇزدىك بيزنەس جوبالاردى ىرىكتەۋ ارقىلى ولاردى جۇزەگە اسىرۋعا قولداۋ كورسەتىلمەك.
مەموراندۋم بارىسىندا باسقارما باسشىسى مارات فاريت ۇلى حالىقارالىق دارەجەدەگى ۋنيۆەرسيتەتپەن ىنتىماقتاستىق كەلىسىمى ورناعانىنا قۋانىشتى ەكەنىن، ستۋدەنتتەردىڭ كاسىبي داعدىلارىن دامىتۋدا جانە جۇمىسقا ورنالاسۋ مۇمكىندىكتەرىن كەڭەيتۋدە باسقارما تاراپىنان قولداۋلار كورسەتىلەتىنىن جەتكىزدى.
