Qazaqstan Respýblikasy Bas prokýratýrasynyń, Qarjylyq monitoring agenttiginiń jáne Ishki ister ministrligi Interpolynyń qyzmetkerleri Grýziiadaǵy Qazaqstan Elshiliginiń qoldaýymen atalǵan elden birneshe ret asa iri mólsherde alaiaqtyq jasaǵany úshin qylmystyq jaýapkershilikke tartý maqsatynda Qazaqstan azamatshasyn ekstraditsiialady, dep habarlaidy dalanews.kz.
Tergeý nusqasy boiynsha kúdikti 2020–2023 jyldar aralyǵynda aýyl sharýashylyǵy taýaryn óndirýshilerdi memlekettik qoldaýǵa bólingen biýdjet qarajatyn jymqyrýdyń qylmystyq shemasyn uiymdastyrǵan. Qylmystyq piǵylyn iske asyrý maqsatynda ol senimdi tulǵalardyń atyna tirkelgen sharýa qojalyqtaryn, asyl tuqymdy iri qara maldy satyp alý týraly jalǵan sharttardy jáne ózge de jalǵan qujattardy paidalanyp, solardyń negizinde jeńildetilgen kreditter men memlekettik sýbsidiialardy zańsyz alǵan.
Qylmystyq áreketterdiń saldarynan memleketke jáne basqa da jábirlenýshilerge jalpy somasy 238 million teńgeden astam zalal keltirilgen. Qylmys jasaǵannan keiin kúdikti qylmystyq qýdalaý organdarynan boi tasalap, halyqaralyq izdeýge jariialanǵan.
Aǵymdaǵy jyldyń naýryz aiynda ol Grýziia aýmaǵynda ustalyp, Qazaqstan Respýblikasy Bas prokýratýrasynyń suraýy boiynsha Qazaqstanǵa ekstraditsiialandy. Qazirgi ýaqytta kúdikti tergeý izoliatoryna qamaldy.
Oǵan taǵylǵan qylmystar úshin múlki tárkilenip, 10 jylǵa deiin bas bostandyǵynan aiyrý jazasy kózdelgen. Eske sala keteiik, jyl basynan beri Grýziiadan 7 adam ekstraditsiialandy, olardyń 5-eýi jymqyrǵany úshin izdeýde bolǵan.
