Oljas Bektenov memlekettik organdar "búrokratıaǵa múlde jol joq" qaǵıdaty boıynsha jumys isteýi qajet ekenin málimdedi, - dep habarlaıdy Dalanews.kz.
Úkimet otyrysynda ekonomıkanyń naqty sektoryn qarjylandyrý máselesin qaraý barysynda premer-mınıstr Oljas Bektenov memlekettik organdar bıznes máselelerin jedel sheship, kedergi jasamaýy kerektigin basa aıtty.
"Biz uzaq kelisý rásimderi men búrokratıalyq kedergilerdiń kesirinen nemese vedomstvoaralyq ózara baılanystardyń joqtyǵynan bolashaǵy zor bastamalardyń baıaýlap qalǵanyn kórip júrmiz. Jaqynda men ınvestısıalyq ahýalǵa arnalǵan keńes ótkizdim. Kóp ýaqyt boıy sozylyp kelgen suraqtar sol arada birden sheshimin tapty. Barlyq memlekettik organdar "búrokratıaǵa múlde jol joq" qaǵıdaty boıynsha jumys isteýge tıis", - dep atap ótti Oljas Bektenov.
Bektenovtiń sózinshe, Úkimettiń mindeti – jobalardy sózbuıdaǵa salmaı jyldam ári tıimdi qarjylandyrý úshin jaǵdaı jasaý.
