Búgin Astana qalasynda Qazaqstan tarihshylary ulttyq kongresiniń forýmy ótti. Oǵan Memlekettik keńesshi Erlan Qarin qatysty. Alqaly jiynda elimizdegi ǵylymi qaýymdastyqtyń 300 ókili, onyń ishinde tarihshy-zertteýshiler, joǵary oqý oryndarynyń oqytýshylary, sondai-aq qoǵam qairatkerleri men buqaralyq aqparat quraldarynyń ókilderi bas qosty, dep jazady Dalanews.kz.
Forýmnyń plenarlyq otyrysynda jáne jeti jumys sektsiiasynda arheologiia, etnografiia, etnologiia, tarihi geografiia salalaryndaǵy jańalyqtardy taldaý, júieleý jáne ǵylymi ainalymǵa engizý máseleleri qarastyryldy. Sonymen qatar Qazaqstan zertteýshileriniń shetel muraǵattarynda, mýzeilerinde jáne kitaphana qorlarynda júrgizgen zertteýleriniń nátijeleri qaraldy.
Basqosýdyń basty taqyrybynyń biri "Qazaqstan tarihy: ejelgi dáýirden búginge deiin" atty jańa akademiialyq basylymdy daiyndaý barysyn talqylaý boldy. Bul jobaǵa bes ǵylymi zertteý institýty jáne elimizdiń 250-den astam ǵalymy jumyldyryldy.
Memlekettik keńesshi óz sózinde Tarihshylardyń ulttyq kongresi elimizdegi tarih ǵylymyn damytý turǵysynan zor mańyzǵa ie ekenin atap ótti. Sondai-aq Saiasi qýǵyn-súrgin qurbandaryn tolyq aqtaý jónindegi memlekettik komissiia jumysynyń nátijesi jáne Qazaqstan tarihynyń jeti tomdyq basylymyn daiyndaý barysy týraly baiandady.
Erlan Qarin sońǵy jyldary ǵylymi ainalymǵa engizilgen arheologiialyq oljalar men arhivtik qujattar ultymyzdyń tarihyn neǵurlym birtutas ári keń aýqymda qabyldaý qajettigin aiǵaqtaidy dep atap ótti.
"Qazaqstan – kóshpendilerdiń ejelgi memlekettik qurylymdarynyń besigi jáne bir kezdegi qýatty elder men imperiialardyń murageri ǵana emes, sonymen qatar tutas kóshpendiler órkenietiniń oshaǵy men ortalyǵy. Sondyqtan ulttyq tarih ǵylymynyń mindeti – halqymyzdyń tarihyna órkeniet paradigmasy turǵysynan aýqymdyraq jáne keńirek qaraý, ony osy ustanym boiynsha dáripteý", – dedi Memlekettik keńesshi.
Forýmǵa qatysýshylar sóz sóilep, ejelgi dáýirden búginge deiingi Qazaqstan tarihyna qatysty kóptomdyq akademiialyq basylymdy ázirleý jumystaryna joǵary baǵa berdi. Sondai-aq arheologiialyq jáne tarihi-mádeni eskertkishterdi zertteý aýqymyn keńeitý, muraǵat pen aimaqtaný isin odan ári damytý, oqýlyqtardy jáne tarihty oqytý ádistemesin jetildirý qajettigine toqtaldy.
