Óskemen qalasynda ótken «Altay Business» forýmy qorytyndylanyp, óńirdegi kásipkerlikti damytýǵa baǵyttalǵan naqty usynystar men bastamalar talqylandy. Jiynda sóz alǵan Shyǵys Qazaqstan oblysynyń ákimi Nurymbet Saqtaǵanov biznes pen bilik arasyndaǵy ózara is-qimyldy jańa deńgeige kóterý qajettigin atap ótti, dep habarlaidy Dalanews.kz.
Aimaq basshysy ekonomikanyń damýy tek pikir almasýmen shektelmei, naqty sheshimder men jedel áreketke bailanysty ekenin jetkizdi.
– Bizdiń basty mindetimiz — biznes aldynda turǵan kedergilerdi kezeń-kezeńimen joiý, qolaily jaǵdai qalyptastyrý jáne jobalardy naqty nátijege deiin jetkizý. Iaǵni, artyq sozbalańǵa salmai, rásimderdi azaityp, naqty iske kóshý qajet. Altai biznes forýmy — bul qorytyndy emes, kerisinshe júieli jumystyń bastamasy dep bilemiz. Búgin kóptegen mańyzdy usynystar aityldy. Men eń bastysyn atap ótkim keledi: biz sizderdi estidik, dialogqa daiynbyz. Ásirese, «bir tereze» qaǵidatyn jetildirý jáne rásimderdi ońailatý máselesin erekshe atap ótkim keledi. Alaida «bir tereze» tek format qana emes, ol — turaqty dialog alańy. Bul jerde biznes pen memleket ózara tiimdi áreket etedi, máseleler jinalmai, jedel sheshiledi, – dedi oblys ákimi.
Sonymen qatar, ákim óńirde «bir tereze» qaǵidaty negizinde kásipkerlerge arnalǵan arnaiy alań qurý josparlanyp otyrǵanyn aitty.
– «Bir tereze» tek format qana emes, ol — turaqty dialog alańy. Bul jerde biznes pen memleket ózara tiimdi áreket etedi, máseleler jinalmai, jedel sheshiledi. Bolashaqta bul kásipkerler óz jobalaryn damytyp, qajetti qoldaýdy jedel ala alatyn tolyqqandy servis ortalyǵy bolady. Sonymen qatar, kreativti indýstriialardy damytý ortalyǵyn qurý múmkindigi de qarastyrylyp jatyr, – dedi oblys ákimi.
Óńir basshysy investitsiia tartý máselesine de erekshe toqtaldy. Onyń aitýynsha, qazirgi tańda óńir ekonomikasyndaǵy investitsiia úlesi 16–17 paiyzdy quraidy. Aldaǵy ýaqytta bul kórsetkishti 25–30 paiyzǵa deiin jetkizý josparlanyp otyr.
– Sońǵy jyldary óńirden halyqtyń kóshýi de azaiyp keledi. Buryn 10-20 myń adamǵa deiin kóship ketse, qazir bul kórsetkish birneshe myńǵa deiin tómendedi. Aldaǵy ýaqytta bul úrdisti tolyq toqtatýǵa múmkindik bar. Bul — jergilikti bilikke degen senimniń artýynyń belgisi. Eger halyq turaqtansa, demek memleketke degen senim kúsheigeni. Memleket basshysynyń negizgi talaby — halyqtyń senimin arttyrý jáne investitsiia tartýǵa tolyq jaǵdai jasaý. Sondyqtan biz sizdermen birge barlyq kedergilerdi joiyp, óńirdiń damýyna birge jumys isteimiz, – dedi Nurymbet Saqtaǵanov.
Aita keteiik, «Altay Business» forýmy qorytyndysynda spikerler arnaiy marapattarǵa ie boldy.
