Mańǵystaý oblystyq máslihatynyń depýtaty Erbol Aitýov plastikalyq operatsiiadan keiin komaǵa túsip, kóz jumǵan jekemenshik klinikada jospardan tys tekseris júrgizilip, birqatar zańbuzýshylyq anyqtaldy. Bul týraly Mańǵystaý oblystyq meditsinalyq jáne farmatsevtikalyq baqylaý komiteti departamenti málimdedi, dep habarlaidy dalanews.kz Tengri health-ke silteme jasap.
Tekseris qandai kemshilikterdi anyqtady?
Vedomstvo málimetinshe, patsient qaitys bolǵannan keiin klinikada kórsetilgen meditsinalyq kómektiń sapasyna jospardan tys tekserý júrgizilgen.
Tekserý nátijesinde uiymdastyrýshylyq-taktikalyq jumystarda, emdeý-diagnostikalyq sharalarda jáne meditsinalyq qujattamany júrgizýde kemshilikter anyqtalǵan.
Belgili bolǵandai, 2026 jylǵy 4 sáýir kúni saǵat 13:35-te Erbol Aitýov jaǵdaiynyń kúrt nasharlaýyna bailanysty jedel járdemmen Mańǵystaý oblystyq kópbeiindi aýrýhanasynyń «qyzyl aimaǵyna» shuǵyl jetkizilgen. Bir aidan keiin, 2026 jylǵy 5 mamyrda ol jansaqtaý bóliminde kóz jumǵan.
Naýqasta qant diabeti bolǵan
Tekserý barysynda Aitýovtyń II tipti qant diabetimen aýyratyny jáne dispanserlik esepte turǵany anyqtalǵan.
Departament málimetinshe, bul jaǵdai hirýrgtiń patsientti operatsiia aldynda endokrinologqa qosymsha tekserilýge jiberýine negiz bolýy tiis edi. Mamandar qandaǵy qant deńgeiin túzetý úshin aldyn ala daiyndyq qajet bolǵanyn aitady.
«Operatsiia aldynda patsient endokrinologtyń konsýltatsiiasyna jiberilmegen. Taldaý barysynda er adam josparly operatsiia aldynda tekserýden ótkeni anyqtaldy, alaida operatsiiaǵa deiingi daiyndyqtyń jáne táýekelderdi baǵalaýdyń keibir kezeńderi qoldanystaǵy standarttarǵa tolyq sáikes oryndalmaǵan», – dep habarlady vedomstvo.
Jaýapkershilik kimge júkteledi?
Departament ókilderi patsientti josparly operatsiiaǵa jiberý týraly sheshim qabyldaý jaýapkershiligi osy klinikanyń bas dárigeri qyzmetin de atqaratyn plastikalyq hirýrgke júkteletinin atap ótti.
Sondai-aq, qatar júretin aýrýlary anyqtalǵanyna qaramastan, dáriger qosymsha tekserýler taǵaiyndamaǵan jáne patsientti endokrinolog pen terapevtke jibermegen.
Vedomstvo zerthanalyq kórsetkishterdegi aýytqýlardy eskere otyryp, patsientti qosymsha tekserýden ótkizip, anyqtalǵan máselelerdi túzetý qajet bolǵanyn málimdedi.
Klinikaǵa hattama toltyryldy
Tekserý qorytyndysy boiynsha meditsinalyq ortalyqqa anyqtalǵan zańbuzýshylyqtardy joiý týraly nusqama berilgen. Sonymen qatar Ákimshilik quqyqbuzýshylyq týraly kodekstiń 464-baby 1-bóligi boiynsha ákimshilik hattama toltyrylǵan. Bul bap litsenziialaý talaptary men ruqsat berý rásimderin buzýǵa qatysty.
Tekserý materialdary Mańǵystaý oblysynyń politsiiasy men prokýratýrasyna joldanǵan. Endi quqyq qorǵaý organdary meditsina qyzmetkerleriniń áreketine quqyqtyq baǵa beredi.
Klinika buǵan deiin de tekserilgen
Farmatsevtikalyq baqylaý departamentiniń málimetinshe, atalǵan meditsinalyq ortalyqta buǵan deiin de patsientterdiń shaǵymdary negizinde jospardan tys tekserýler júrgizilgen. Onyń biri 2023 jyly, ekinshisi 2025 jyly ótken.
Sondai-aq vedomstvo klinikanyń litsenziiasy bar ekenin habarlady.
«Meditsinalyq ortalyq qyzmetin 2015 jylǵy 31 shildede berilgen litsenziia negizinde júzege asyrady. Litsenziia aiasynda eresekterge statsionarlyq meditsinalyq kómek kórsetý, plastikalyq hirýrgiia, anesteziologiia jáne reanimatologiia qyzmetterin kórsetýge ruqsaty bar», – dep málimdedi vedomstvo.
Eske salaiyq, Aqtaýdaǵy jekemenshik klinikada jasalǵan plastikalyq operatsiiadan keiin Erbol Aitýovtyń qaitys bolǵany týraly aqparat 22 mamyrda belgili bolǵan edi.
