Memlekettik keńesshi Erlan Qarin «Qazaqstan» telearnasynyń «Bas taqyryp» baǵdarlamasyna bergen suhbatynda sońǵy jyldary keibir eldi mekenderde eskertkishterdi ornatý boiynsha «jarys» ótetinine nazar aýdaryp, bul jumystardy ortalyqtandyrý qajet ekendigine toqtaldy, - dep jazady Dalanews.kz.
Memkeńesshiniń atap ótkenindei sońǵy jyldary bul salada bir-birimen jarysý, bei-bereket sheshimder qabyldaý kóbeigen.
Erlan Qarin bul jaǵdaidy toqtatý úshin eskertkishterdi ornatýdy ministrlik deńgeiindegi komissiianyń kelisimimen jáne bekitilgen standarttarǵa sai júrgizý qajet ekenin aitty.
«Keibir aýyldarda, eldi mekenderde tipti bir-birimen jarysatyndar bar. Qaisysynyń ata-babasyna eskertkish qalai qoiyldy, tipti onyń biiktigimen jarysatyn úrdis paida boldy. Bir jerde 4 metr eskertkish tursa, sol aýdandaǵy ekinshi bir eskertkishti jarysyp 5 metr qylyp qoiady, tipti bizge sońǵy kelgen bir eskizderdiń biiktigi 8 metrden asyp ketken. Muny toqtatý kerek», - dedi ol «Bas taqyryp» baǵdarlamasyna bergen suhbatynda.
Qarinniń aitýynsha sońǵy kezde jergilikti atqarýshy bilik pen ministrliktiń komissiiasynan ótpei, maquldamai, aqyldaspai birden eskerkishti quryp qoiatyn jaǵdailar jiilep ketken. Tipti, «eskertkish daiyn tur, osyny ornatý kerek» dep talap qoiatyndar da bar.
«Táýelsizdik jyldarynda Qazaqstanda 1000-nan asa eskertkish ornatylǵan. Bul Keńes Odaǵy kezeńindegi kórsetkishten úsh ese artyq. Eskertkish ornatý jarys bolyp ketti. Eger muny retke keltirmesek, onda taǵy da berekesizdik bolady.
Osyǵan bailanysty ár eskertkishtiń kórkemdik jáne mán-maǵynalyq jaǵy basty nazarǵa alynady. Jaqynda ornatylǵan Ahmet Baitursynov, Muhtar Áýezov, Berdibek Soqpaqbaev eskertkishteri halyqtyń oń baǵasyn alǵany osy talaptardyń nátijesi deýge bolady», - dedi Memlekettik keńesshi.
