Parlament otyrysynda elimizdegi jeńil ónerkásip máselesi sóz bolyp, senator Serik Jaqsybekov bizneske beriletin indýstrialdy sertifikat qyzmetin synady.
"Bylai qaraǵanda jep-jeńil jumys sekildi. Kompaniia sertifikat alý úshin ("Atamekenge" red.) ótinish joldaidy. Sóitip 2 aidan 6 aiǵa deiingi aralyqta álgi ótinishti sarylyp kútedi. Ótinishti qabyldap alǵandar ne habaryn aitpaidy, ne jaýabyn joldamaidy. Tipten túsiniksiz.
Sertifikat alýdyń erejesine sai kompaniiaǵa sarapshy kelip, baǵalaý jumysyn júrgizý kerek eken.
Sertifikatty ótkizip qoiǵan kásiporyn álgi sarapshyny aptalap, ailap kútedi. Onyń qashan, qai mezgilde keletini habarlanbaidy. Minekei, kórip shyǵyńyz...", - degen Jaqsybekov qolyndaǵy qaǵazdy Nazarbaevaǵa ustatty.
Artynsha Qarjy vitse-ministri Berik Sholpanqulov sóz alyp, sertifikatty "Atameken" kásipkerler palatasy beretinin eske saldy.
"Ol jaqtaǵylar sizder kótergen máseleden qulaǵdar. Bul jumysty barynsha yqshamdap, júieleýge tyrysyp jatyr...", - dedi Sholpanqulov.
Nazarbaeva "Atamekenniń" kásipkerlerge beretin indýstrialdy sertifikat qyzmetin synap, bul jumysty memleket quziretine qaitarýdy usyndy.
"Bul isti memleketke júkteý kerek. Jalpy túrli sertifikat tabystaityn qyzmet túrlerin memleket jaýapkershiligine qaitarǵan jón. Nege? "Atameken" bul isti ákete almai otyrǵanyn ózderińiz aittyńyzdar. Nátijesi shamaly eken. Sertifikat tabystaýdyń ózin para alyp, para beretin alańqaiǵa ainaldyrypty.
Onyń ústine indýstrialdy sertifikattar memlekettik tapsyrystyń standartyna sai emes. Munda da jeń ushynan jalǵasqan jemqorlyqty ańǵaramyz. Suraǵanyn berse, álgi sertifikatty kim kóringen alýy múmkin.
Jalpy bul saladaǵy bylyq bastan asady. Sertifikat berýdi memleketke qaitaryp, tártip ornatý kerek", – dedi Dariǵa Nazarbaev.
Indýstrialdy sertifikat kásiporynnyń ónim óndiretinin rastaityn qujat. Ótinish berýshiniń tehnikalyq, tehnologiialyq, resýrstyq múmkindikteri bar ekenin kórsetedi, ónim óndirýge shamasy jetetindigin aiǵaqtaidy, tizimde kórsetilgen qyzmet aýqymyn kórsetýge qaýqary jetetinin dáleldeidi.
Jeńil ónerkásippen ainalysatyn jáne jihaz ázirleitin kásipkerlerden memlekettik satyp alýǵa qatysý úshin indýstrialdy sertifikat talap etiledi.
"Atameken" osy arqyly aty bar, zaty joq kásiporyndarmen kúresetinin aitqan.
"Biz jeńil ónerkásip ónimderin eksporttaǵannan góri, 17 ese kóp importtaimyz.
Qazirgi kezde Qazaqstanda jeńil ónerkásipke kóbinese vedomstvolyq memlekettik tapsyrystar arqyly qoldaý jasalyp otyr, solardyń esebinen kásiporyndar jumysyn jalǵastyrýda. Biraq túrli sebepterge bailanysty bul kásiporyndarǵa tehnologiialyq turǵydan damýǵa, assortimentti keńeitýge múmkindik bermeidi.
Memlekettik satyp alýǵa alyp-satarlar kóp qatysady. Tapsyrys berýshi tómen baǵaǵa qyzyǵyp, sapasyz importtyq taýar alady. Nátijesinde biýdjet qarajaty elden shyǵarylyp, basqa elderdiń ekonomikasyn damytýǵa demeýshi bolady", - deidi óz kezeginde Dariǵa Nazarbaev.
