Syr óńiriniń áleýmettik-ekonomikalyq damýyna ólsheýsiz úles qosqan memleket jáne qoǵam qairatkeri Nálqoja Aqbalauly Ergeshbaevty eske alýǵa arnalǵan toǵyzqumalaqtan halyqaralyq týrnirdiń saltanatty ashylý rásimi ótti, dep habarlaidy Dalanews.kz
Taǵylymy mol sharaǵa oblys ákiminiń birinshi orynbasary Daniiar Erenǵaliuly, oblystyq ardagerler keńesiniń tóraǵasy Serik Dúisenbaev, oblystyq máslihattyń turaqty komissiia tóraǵasy Baýyrjan Sándibaev, qalalyq ardagerler keńesiniń tóraǵasy Ómirbek Shámenov, Qazaqstannyń Eńbek Erleri Abzal Eraliev pen Imamzada Shaǵyrtaev, oblystyq máslihat depýtaty Jorabek Nurymbetov, «Toǵyzqumalaq sporty federatsiiasy» zańdy tulǵalar birlestiginiń vitse-prezidenti, ulttyq quramanyń bas jattyqtyrýshysy Ainur Jaqapbaeva, Qoja Ahmet Iassaýi ýniversitetiniń «Halyqaralyq Túrki ziiatkerlik oiyndar» ortalyǵynyń basshysy, halyqaralyq dárejedegi tóreshi Qashymhan Dáýrenqulov, Qyzylorda oblystyq toǵyzqumalaq ziiatkerlik qaýymdastyǵynyń prezidenti Ábdiqadyr Ergeshbaev qatysty.
— Aimaǵymyzdyń órkendeýine bar kúsh-jigerin arnap, el igiligi jolynda aianbai qyzmet etken azamattardyń esimin ulyqtaý – barshamyzǵa ortaq paryz. Nálqoja Aqbalauly – sanaly ǵumyryn halyq igiligine arnaǵan, jastardyń bilimdi de básekege qabiletti bolyp qalyptasýyna airyqsha kóńil bólgen biregei tulǵa. Onyń bastamasymen óńirimizde birqatar sport nysandary men mádeniet oshaqtary boi kóterdi. Búgingi dástúrli halyqaralyq týrnir – sol eńbektiń jarqyn jalǵasy dep bilemin. Búgingi dodada naǵyz myqty sportshylar top jaryp, jeńis tuǵyrynan kórinedi dep senemin, — dedi oblys ákiminiń birinshi orynbasary.
Aita keteiik, dástúrge ainalǵan halyqaralyq týrnir biyl toǵyzynshy ret uiymdastyrylyp otyr. Bairaqty básekege Qyrǵyzstan, Ázirbaijan, Túrikmenstan, Aýǵanstan memleketterinen jáne elimizdiń barlyq óńirinen kelgen 450-ge jýyq sportshy ózara saiysady.
7-shi naýryzǵa deiin jalǵasatyn jarys qorytyndysy boiynsha jeńimpazdar men júldegerler arnaiy medaldar jáne diplomdarmen marapattalady.
