2000 jyldardyń ortasynda memleket bank sektoryn qutqarý operatsiiasyn iske qosyp, birqatar ekinshi deńgeidegi bankterge aqshalai kómekteskeni belgili. Búgin Májiliske kelip qalǵan Ulttyq bank tóraǵasy Timýr Súleimenovten depýtattar osynyń jaiyna keńinen toqtalýdy surady, dep habarlaidy Dalanews.kz.
Timýr Súleimenov 2000 jyldardyń ortasynda sol kezdegi "júie quraýshy" degen bankterge obligatsiialaryn satyp alý arqyly memleket kómek kórsetkenin naqtylady. Sondai-aq, ol sonyń kesirinen Ulttyq qor 2 trln teńgege jýyq shyǵynǵa ushyraǵanyn basa atap ótti.
"Bankterge 2000 jyldardyń ortasynan bastap obligatsiialaryn satyp alý arqyly kómek kórsetildi. Olar óte tómen mólsherlemelermen, iaǵni 1%-dan 3%-ǵa deiingi aralyqta shyǵaryldy. Jalpy nominaldy quny 3 trln teńgeden asady, al shyndyǵynda naryqtyq quny 1,1 trln teńge boldy. Iá, olar naryqtyq emes sharttarmen shyǵaryldy", - dedi Súleimenov.
Ulttyq bank basshysy 2022 jyly Qazaqstanda Ulttyq qordy basqarý erejelerine ózgerister engizilgenin eske sala ketti. Oǵan sáikes, Ulttyq qordyń qarajatyn endi ortasha merzimdi infliatsiia deńgeiinde (10-12%) paiyzdyq mólsherlemesi bar quraldarǵa ǵana investitsiialaýǵa bolady. Bul deńgei memlekettik qaryz mólsherlemesimen sáikes keledi.
Súleimenov bank obligatsiialary qandai memlekettik kómek baǵdarlamasy boiynsha satyp alynǵanyn aita almady.
