2000 جىلداردىڭ ورتاسىندا مەملەكەت بانك سەكتورىن قۇتقارۋ وپەراسياسىن ىسكە قوسىپ، ءبىرقاتار ەكىنشى دەڭگەيدەگى بانكتەرگە اقشالاي كومەكتەسكەنى بەلگىلى. بۇگىن ماجىلىسكە كەلىپ قالعان ۇلتتىق بانك ءتوراعاسى تيمۋر سۇلەيمەنوۆتەن دەپۋتاتتار وسىنىڭ جايىنا كەڭىنەن توقتالۋدى سۇرادى، دەپ حابارلايدى Dalanews.kz.
تيمۋر سۇلەيمەنوۆ 2000 جىلداردىڭ ورتاسىندا سول كەزدەگى "جۇيە قۇراۋشى" دەگەن بانكتەرگە وبليگاسيالارىن ساتىپ الۋ ارقىلى مەملەكەت كومەك كورسەتكەنىن ناقتىلادى. سونداي-اق، ول سونىڭ كەسىرىنەن ۇلتتىق قور 2 ترلن تەڭگەگە جۋىق شىعىنعا ۇشىراعانىن باسا اتاپ ءوتتى.
"بانكتەرگە 2000 جىلداردىڭ ورتاسىنان باستاپ وبليگاسيالارىن ساتىپ الۋ ارقىلى كومەك كورسەتىلدى. ولار وتە تومەن مولشەرلەمەلەرمەن، ياعني 1%-دان 3%-عا دەيىنگى ارالىقتا شىعارىلدى. جالپى نومينالدى قۇنى 3 ترلن تەڭگەدەن اسادى، ال شىندىعىندا نارىقتىق قۇنى 1،1 ترلن تەڭگە بولدى. ءيا، ولار نارىقتىق ەمەس شارتتارمەن شىعارىلدى"، - دەدى سۇلەيمەنوۆ.
ۇلتتىق بانك باسشىسى 2022 جىلى قازاقستاندا ۇلتتىق قوردى باسقارۋ ەرەجەلەرىنە وزگەرىستەر ەنگىزىلگەنىن ەسكە سالا كەتتى. وعان سايكەس، ۇلتتىق قوردىڭ قاراجاتىن ەندى ورتاشا مەرزىمدى ينفلياسيا دەڭگەيىندە (10-12%) پايىزدىق مولشەرلەمەسى بار قۇرالدارعا عانا ينۆەستيسيالاۋعا بولادى. بۇل دەڭگەي مەملەكەتتىك قارىز مولشەرلەمەسىمەن سايكەس كەلەدى.
سۇلەيمەنوۆ بانك وبليگاسيالارى قانداي مەملەكەتتىك كومەك باعدارلاماسى بويىنشا ساتىپ الىنعانىن ايتا المادى.
