Meliorativtik brigada Jetisýdaǵy kúrish alqaptarynyń kanaldaryn tazartady
Aýdanǵa sapary kezinde oblys basshysy aldymen Birlik aýylyndaǵy «Birlik» agrofirmasy» JShS-nyń kúrish alqaptaryn aralap, sharýashylyqtyń jai-kúiimen tanysty. Seriktestik direktory Almas Qystaýbaevtyń aitýynsha, sharýashylyq biyl - 1114 ga kúrish, 1589 ga – bidai, 2744 ga kóp jyldyq shóp ósirgen. Ujymda 300-ge jýyq adam eńbek etedi, al maýsymdyq kezeńde jumysshylar sany 500-ge jetedi. Munda 50-ge jýyq aýyl sharýashylyǵy tehnikasy bar. Sonyń 4-eýi ótken jyly «Jetisý» ÁKK» AQ arqyly lizingige alynǵan bolatyn. Osylaisha aýdanda qurylǵan servistik-daiyndaý ortalyǵynda agrarlyq jumystarǵa qajetti barlyq tehnika toptastyrylǵan.
Sol siiaqty oblys basshysy seriktestikke tiesili qyrmanda jáne zaýytta da bolyp, olardaǵy jumys barysymen tanysty. Zaýyt saǵatyna 1 tonna taza ónim shyǵarady. «Birliktiń» kúrishi oblysta ǵana emes, Almaty qalasynda, taiaý shetelderde saýdalanady. Máselen, ótken jyly kásiporyn 1250 tonna taza ónim alǵan.
Sharýashylyq direktory A.Qystaýbaev negizgi másele retinde sýarý júielerin jóndeý men tazartý jumystaryn júrgizý kerektigine toqtaldy. Bul rette Amandyq Batalov Almaty oblysynda irrigatsiialyq júielerdi qalpyna keltirý jumystary jolǵa qoiylǵanyn atap ótti.
– Iá, kúrish sýdy kóp qajet etedi. Onyń alqabyn azaitqanda jerdiń sory shyǵyp, oǵan eshteńe óspei qalýy da múmkin. Sondyqtan bul iske júieli jospar jasap baryp kirisý kerek. Ázirge kúrishtiń alqaptaryn saqtap qalamyz. Ol úshin Balqash aýdanynyń sýarý júielerin jańǵyrtýdy jeke joba retinde qarastyramyz. Kúrish alqaptaryn sýaratyn kanaldardy tazartýdy qolǵa alamyz. Buǵan deiin biz meliorativtik brigada quryp, Qaratal ózeniniń arnasyn arshyp, onyń Balqashqa erkin quiylýyna jaǵdai jasap, eleýli jumystar atqarǵanbyz. Sondyqtan bul jaǵynan bizdiń tájiribemiz bar deýge bolady. Ile ózeniniń sýyn taratatyn bas kanaldy kúrdeli jóndeý máselesi kún tártibine qoiylady. Buǵan deiin qajetti tehnikalar satyp áperip, servistik daiyndaý ortalyqtaryn qurdyq. Osyndai qoldaý sharalary sharýashylyqtarǵa budan bylai da kórsetiletin bolady, – dedi Amandyq Batalov.
