اۋدانعا ساپارى كەزىندە وبلىس باسشىسى الدىمەن بىرلىك اۋىلىنداعى «بىرلىك» اگروفيرماسى» جشس-نىڭ كۇرىش القاپتارىن ارالاپ، شارۋاشىلىقتىڭ جاي-كۇيىمەن تانىستى. سەرىكتەستىك ديرەكتورى الماس قىستاۋبايەۆتىڭ ايتۋىنشا، شارۋاشىلىق بيىل - 1114 گا كۇرىش، 1589 گا – بيداي، 2744 گا كوپ جىلدىق ءشوپ وسىرگەن. ۇجىمدا 300-گە جۋىق ادام ەڭبەك ەتەدى، ال ماۋسىمدىق كەزەڭدە جۇمىسشىلار سانى 500-گە جەتەدى. مۇندا 50-گە جۋىق اۋىل شارۋاشىلىعى تەحنيكاسى بار. سونىڭ 4-ەۋى وتكەن جىلى «جەتىسۋ» اكك» اق ارقىلى ليزينگىگە الىنعان بولاتىن. وسىلايشا اۋداندا قۇرىلعان سەرۆيستىك-دايىنداۋ ورتالىعىندا اگرارلىق جۇمىستارعا قاجەتتى بارلىق تەحنيكا توپتاستىرىلعان.
سول سياقتى وبلىس باسشىسى سەرىكتەستىككە تيەسىلى قىرماندا جانە زاۋىتتا دا بولىپ، ولارداعى جۇمىس بارىسىمەن تانىستى. زاۋىت ساعاتىنا 1 توننا تازا ءونىم شىعارادى. «بىرلىكتىڭ» كۇرىشى وبلىستا عانا ەمەس، الماتى قالاسىندا، تاياۋ شەتەلدەردە ساۋدالانادى. ماسەلەن، وتكەن جىلى كاسىپورىن 1250 توننا تازا ءونىم العان.
شارۋاشىلىق ديرەكتورى ا.قىستاۋبايەۆ نەگىزگى ماسەلە رەتىندە سۋارۋ جۇيەلەرىن جوندەۋ مەن تازارتۋ جۇمىستارىن جۇرگىزۋ كەرەكتىگىنە توقتالدى. بۇل رەتتە اماندىق باتالوۆ الماتى وبلىسىندا يرريگاسيالىق جۇيەلەردى قالپىنا كەلتىرۋ جۇمىستارى جولعا قويىلعانىن اتاپ ءوتتى.
– ءيا، كۇرىش سۋدى كوپ قاجەت ەتەدى. ونىڭ القابىن ازايتقاندا جەردىڭ سورى شىعىپ، وعان ەشتەڭە وسپەي قالۋى دا مۇمكىن. سوندىقتان بۇل ىسكە جۇيەلى جوسپار جاساپ بارىپ كىرىسۋ كەرەك. ازىرگە كۇرىشتىڭ القاپتارىن ساقتاپ قالامىز. ول ءۇشىن بالقاش اۋدانىنىڭ سۋارۋ جۇيەلەرىن جاڭعىرتۋدى جەكە جوبا رەتىندە قاراستىرامىز. كۇرىش القاپتارىن سۋاراتىن كانالداردى تازارتۋدى قولعا الامىز. بۇعان دەيىن ءبىز مەليوراتيۆتىك بريگادا قۇرىپ، قاراتال وزەنىنىڭ ارناسىن ارشىپ، ونىڭ بالقاشقا ەركىن قۇيىلۋىنا جاعداي جاساپ، ەلەۋلى جۇمىستار اتقارعانبىز. سوندىقتان بۇل جاعىنان ءبىزدىڭ تاجىريبەمىز بار دەۋگە بولادى. ىلە وزەنىنىڭ سۋىن تاراتاتىن باس كانالدى كۇردەلى جوندەۋ ماسەلەسى كۇن تارتىبىنە قويىلادى. بۇعان دەيىن قاجەتتى تەحنيكالار ساتىپ اپەرىپ، سەرۆيستىك دايىنداۋ ورتالىقتارىن قۇردىق. وسىنداي قولداۋ شارالارى شارۋاشىلىقتارعا بۇدان بىلاي دا كورسەتىلەتىن بولادى، – دەدى اماندىق باتالوۆ.
