Qazaqstanda mektepterde uialy telefon paidalaný tártibi Oqý-aǵartý ministrliginiń quzyretine berildi. Qazir bul máselege qatysty jańa erejeler ázirlenip, kelisý jáne talqylaý kezeńinen ótip jatyr. Bul týraly QR Oqý-aǵartý birinshi vitse-ministri Shynar Aqparova málimdedi, dep habarlaidy dalanews.kz.
Onyń aitýynsha, jańa qaǵidalarǵa sáikes, oqýshylar uialy telefondy oqý protsesi kezinde paidalana almaidy.
– Uialy telefondar sabaq barysynda qoldanylmaýy tiis. Bul talap erejede naqty kórsetilgen. Alaida mektepte qajetti jaǵdai jasalǵan bolsa, úzilis kezinde oqýshylar telefondaryn paidalana alady, – dedi vitse-ministr.
Sonymen qatar muǵalimniń kúntizbelik-taqyryptyq josparyna sáikes sabaq barysynda belgili bir tapsyrmalar qarastyrylsa, oqýshylarǵa telefon qoldanýǵa ruqsat beriledi.
– Eger pedagogtiń kúntizbelik-taqyryptyq josparynda telefondy qoldanýdy qajet etetin jumys túrleri bolsa, onda oqýshylar ony sabaq kezinde paidalana alady. Bul tek oqý baǵdarlamasyna sáikes júzege asyrylady, – dedi Shynar Aqparova.
Telefondardy seifke tapsyrý mindettelmeidi
Vitse-ministr jańa erejelerde telefondardy mindetti túrde seifte saqtaý talaby qarastyrylmaǵanyn aitty.
– Biz telefondardy mindetti túrde seifte saqtaý jóninde talap engizip otyrǵan joqpyz. Telefon oqýshynyń sómkesinde de, synypta da bolýy múmkin. Eń bastysy – sabaq kezinde óshirilip turýy tiis, – dep túsindirdi ol.
Sondai-aq ata-analardyń balalarymen bailanysýy úshin mektepterde arnaiy bailanys arnalary usynylady.
– Ata-analar qajet bolǵan jaǵdaida balalarymen habarlasa alýy úshin biryńǵai bailanys nómirleri nemese bailanys arnalary qarastyrylady. Bul talaptar da jańa erejede kórsetilgen, – dedi birinshi vitse-ministr.
Muǵalimder telefon joǵalsa jaýap bere me?
Jýrnalisterdiń muǵalimder oqýshylardyń joǵalǵan telefondary úshin materialdyq jaýapkershilikke tartyla ma degen suraǵyna Shynar Aqparova mundai norma qarastyrylmaǵanyn aitty.
– Bul jerde materialdyq jaýapkershilik týraly másele kóterilip otyrǵan joq. Árine, muǵalimder oqý protsesi kezinde balalardyń qaýipsizdigine, ómiri men densaýlyǵyna jaýap beredi. Biraq telefon joǵalǵan jaǵdaida pedagogtan materialdyq ótemaqy talap etý nemese ony avtomatty túrde jaýapty etý qarastyrylmaǵan, – dedi ol.
Vitse-ministrdiń aitýynsha, telefon joǵalǵan árbir jaǵdai jeke qaralady.
– Eger mundai jaǵdai oryn alsa, onyń qashan jáne qandai jaǵdaida bolǵany anyqtalady. Tiisti sharalar qabyldanady. Eń aldymen kináli tulǵany anyqtaý qajet bolady, – dep túiindedi Shynar Aqparova.
