Osy jyldyń 1 tamyzy men 30 qyrkúıegi aralyǵynda «Mektepke jol» respýblıkalyq aksıasy uıymdastyrylady. Bıyl Jetisý oblysynda áleýmettik osal toptaǵy 16650 balaǵa kómek kórsetý josparlanýda- dep habarlaıdy Dalanews.kz 

Jyl saıynǵy bul dástúrli aksıa az qamtylǵan, kóp balaly, jetim jáne ata-anasynyń qamqorlyǵynsyz qalǵan balalarǵa oqý jylynyń bastalýyna daıyndyq kezinde materıaldyq qoldaý kórsetý maqsatynda ótkiziledi.

Búgingi kúni aksıany uıymdastyrý jáne ótkizý boıynsha óńirlik is-sharalar jospary jasalyp, kómekke muqtaj balalardyń tizimi jınaqtalyp, bekitilgen.

«Bıylǵy jylǵa aýdan, qalalarda áleýmettik osal toptaǵy  16650 balanyń mektepke jınalýyna kómek kórsetiledi dep josparlanyp otyr. Sonymen qatar, Qazaqstan Respýblıkasy Úkimetiniń qaýlysy aıasynda áleýmettik osal toptaǵy otbasylardyń 25229 balasyn kıim-keshek, keńse taýarlarymen qamtý maqsatynda jergilikti búdjetten 1,1 mlrd. teńgeden astam qarajat bólindi. Búgingi kúnge Aqsý, Kóksý, Kerbulaq aýdandarynda 100% aýdarym jasaldy. Qalǵan qala, aýdandarda 15 tamyzǵa deıin tolyq aıaqtaý josparda bar», - delingen oblystyq bilim basqarmasynyń habarlamasynda.