Almaty ákimdigi jeńil relsti kólik (LRT) jobasy boiynsha vagondardy satyp alý máselesine qatysty túsinikteme berdi. Vedomstvonyń málimetinshe, qazirgi tańda jobanyń tehnikalyq-ekonomikalyq negizdemesinde tek infraqurylym qurylysyna arnalǵan shyǵyndar qarastyrylǵan, dep habarlaidy dalanews.kz.
Ákimdik ókilderiniń aitýynsha, qujatta estakadalar, stantsiialar, injenerlik kommýnikatsiialar men basqa da qajetti nysandardy salý shyǵyndary qamtylǵan. Al vagondardy satyp alý qurylys jumystarynyń quramyna engizilmegen.
«Vagondardy satyp alý jyljymaly quramdy jetkizýdi, iske qosý-baptaý jumystaryn, synaqtan ótkizýdi jáne paidalanýǵa berýdi kózdeitin jeke joba aiasynda júzege asyrylady», – dep habarlady ákimdik.
Vedomstvonyń málimetinshe, atalǵan joba boiynsha bólek qujattama ázirlenip, keiin memlekettik saraptamadan ótkiziledi.
Qazirgi ýaqytta LRT poiyzdaryn jetkizetin kompaniia tańdalmaǵan. Mamandar ázirge jyljymaly quramnyń tehnikalyq parametrlerin naqtylap jatyr.
Ákimdik usynǵan derekke sáikes, bir vagonnyń syiymdylyǵy 285 adamǵa eseptelgen. Onyń ishinde otyrǵan jáne turǵan jolaýshylar da bar. Al poiyzdardyń ortasha qozǵalys jyldamdyǵy saǵatyna 35 shaqyrym bolady dep josparlanǵan.
Sondai-aq qala ákimdigi LRT jobasynyń túpkilikti quny ázirge eseptelmegenin málimdedi.
«Jobanyń naqty baǵasy memlekettik saraptamanyń oń qorytyndysy shyqqannan keiin belgili bolady», – dep habarlady vedomstvo.
