Алматы әкімдігі жеңіл рельсті көлік (LRT) жобасы бойынша вагондарды сатып алу мәселесіне қатысты түсініктеме берді. Ведомствоның мәліметінше, қазіргі таңда жобаның техникалық-экономикалық негіздемесінде тек инфрақұрылым құрылысына арналған шығындар қарастырылған, деп хабарлайды dalanews.kz.
Әкімдік өкілдерінің айтуынша, құжатта эстакадалар, станциялар, инженерлік коммуникациялар мен басқа да қажетті нысандарды салу шығындары қамтылған. Ал вагондарды сатып алу құрылыс жұмыстарының құрамына енгізілмеген.
«Вагондарды сатып алу жылжымалы құрамды жеткізуді, іске қосу-баптау жұмыстарын, сынақтан өткізуді және пайдалануға беруді көздейтін жеке жоба аясында жүзеге асырылады», – деп хабарлады әкімдік.
Ведомствоның мәліметінше, аталған жоба бойынша бөлек құжаттама әзірленіп, кейін мемлекеттік сараптамадан өткізіледі.
Қазіргі уақытта LRT пойыздарын жеткізетін компания таңдалмаған. Мамандар әзірге жылжымалы құрамның техникалық параметрлерін нақтылап жатыр.
Әкімдік ұсынған дерекке сәйкес, бір вагонның сыйымдылығы 285 адамға есептелген. Оның ішінде отырған және тұрған жолаушылар да бар. Ал пойыздардың орташа қозғалыс жылдамдығы сағатына 35 шақырым болады деп жоспарланған.
Сондай-ақ қала әкімдігі LRT жобасының түпкілікті құны әзірге есептелмегенін мәлімдеді.
«Жобаның нақты бағасы мемлекеттік сараптаманың оң қорытындысы шыққаннан кейін белгілі болады», – деп хабарлады ведомство.
