"Jalpyǵa birdei bilim berý" qory aiasynda ata-analardyń jáne zańdy ókilderdiń esepshottaryna mektep formasyn, aiaq kiim men oqý-quraldaryn satyp alý úshin shamamen 20 mlrd teńge aýdaryldy, dep habarlaidy Dalanews.kz.
QR Oqý-aǵartý ministrligi baspasóz qyzmetiniń habarlaýynsha, qoldaý 430 myńnan astam balany qamtydy, bul jalpy alýshylar sanynyń 87%-yna jýyq.
"2025 jyly kómek 500 myńnan astam balaǵa kórsetiledi. Onyń ishinde – jetim balalar, ata-anasynyń qamqorlyǵynsyz qalǵandar, az qamtamasyz etilgen jáne ataýly áleýmettik kómek alýshy otbasylardyń balalary, sondai-aq ómirlik qiyn jaǵdaiǵa tap bolǵan balalar bar", delingen ministrlik habarlamasynda.
Búginde Astana men Shymkent qalalarynda qarajat tolyq kólemde aýdarylyp, 100% otbasy kómek aldy.
"Óńirler ata-analardyń esepshottaryna qarajatty belsendi túrde aýdarýda. Kómek alǵandar satyp alynǵan taýarlardy rastaityn qujattardy usynýy tiis. Tólemdi alý úshin ótinish jazý jetkilikti", dep atap ótti QR Oqý-aǵartý ministrligi Balalardyń quqyqtaryn qorǵaý komitetiniń tóraiymy Nasymjan Ospanova.
2025 jyly "Jalpyǵa birdei bilim berý" qory boiynsha jalpy qarjylandyrý kólemi 23,1 mlrd teńgeni quraidy. Tólem mólsheri óńirlik biýdjetke sáikes, máslihat sheshimi negizinde belgilenedi jáne bir balaǵa keminde 46 228 teńgeden tómen bolmaýy tiis.
Aita ketý kerek, 2023 jyldan beri materialdyq kómek kólemi 2,5 esege ósip, 17 myńnan 46 myń teńgege deiin artty.
