Senat depýtaty Rýslan Rústemov elimizdegi mektep kitaphanalarynda qazaq tilindegi balalar ádebietiniń aitarlyqtai jetispeitinin aityp, alańdaýshylyq bildirdi, dep habarlaidy Dalanews.kz.
Onyń málimetinshe, qazirgi tańda mektepterdegi kitap qoryndaǵy týyndylardyń nebári 11,8 paiyzy ǵana qazaq tilinde.
“Jyl saiyn jaryq kóretin balalar kitaptarynyń sany 30–40 danany ǵana quraidy. Onyń ózi 1000–2000 dana kóleminde basylyp shyǵady. Mundai taralym bir ǵana oblystyń suranysyn da qamti almaidy”, – dedi senator.
Rústemov aýyldyq jerlerdegi jaǵdaidyń tipten kúrdeli ekenine toqtaldy. Aitýynsha, Qazaqstandaǵy balalardyń tek úshten biri ǵana óz erkimen kitap oqidy, al kóp jaǵdaida balalar kitapty tek sabaq úshin qolyna alady.
“Biz balalardyń ádebietke degen qyzyǵýshylyǵyn joǵaltyp alyp jatyrmyz. Qazirgi zamanǵa sai formattaǵy kitaptar – animatsiialyq nusqalar, inkliýzivti mátinder – múlde damymai otyr”, – dedi ol.
Senator oqyrman urpaqty tárbieleý úshin balalar ádebietiniń kólemin ǵana emes, sapasyn da arttyryp, jańa tehnologiialyq tásildermen ushtastyrý qajet ekenin alǵa tartty.
