Atyraýda ótip jatqan Ulttyq quryltaida Memleket basshysy Qasym-Jomart Toqaev kásipkerlerdi áleýmettik nysandar salýǵa shaqyrdy, dep habarlaidy Dalanews.kz.
"Elge janashyr isker azamattar bizde de az emes. Mundai azamattar qoǵamǵa qajetti kóptegen jobaǵa qarjy salyp, igi isterdiń basy-qasynda júr. Qaiyrymdylyq jáne volonterlik bastamalarǵa demeýshilik jasap keledi. Memleket te otanshyl azamattardy ózgelerge úlgi etip, olarǵa qoldaý kórsetedi", - dedi Toqaev.
Onyń sózinshe, aimaqtarda óz qarjysyna meshit salǵan kásipkerlerdiń nieti túzý, olardy túsinýge bolady.
"Alaida, jańa mektep, jataqhana, aýrýhana, kitaphana, murajai nemese sport saraiyn turǵyzý áldeqaida mańyzdyraq. Munyń saýaby mol. Keiingi urpaq ta osyndai igi isterge alǵys aitary anyq.
Biznes ókilderi barlyq salada belsendi bolýy qajet. Muqtaj jandarǵa qolynan kelgenshe kómek kórsetip, árdaiym áleýmettik jaýapkershilik tanytýy kerek. Sonda ǵana, shyn máninde, jańa ulttyq býrjýaziia qalyptasady dep aita alamyz", - dedi Prezident.
Dál osyndai ulttyq býrjýaziia ókilderi básekege qabiletti ekonomika qurýǵa jáne halqyna qaltqysyz qyzmet etýge qashanda daiyn bolady.
