اتىراۋدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ كاسىپكەرلەردى الەۋمەتتىك نىساندار سالۋعا شاقىردى، دەپ حابارلايدى Dalanews.kz.
"ەلگە جاناشىر ىسكەر ازاماتتار بىزدە دە از ەمەس. مۇنداي ازاماتتار قوعامعا قاجەتتى كوپتەگەن جوباعا قارجى سالىپ، يگى ىستەردىڭ باسى-قاسىندا ءجۇر. قايىرىمدىلىق جانە ۆولونتەرلىك باستامالارعا دەمەۋشىلىك جاساپ كەلەدى. مەملەكەت تە وتانشىل ازاماتتاردى وزگەلەرگە ۇلگى ەتىپ، ولارعا قولداۋ كورسەتەدى"، - دەدى توقايەۆ.
ونىڭ سوزىنشە، ايماقتاردا ءوز قارجىسىنا مەشىت سالعان كاسىپكەرلەردىڭ نيەتى ءتۇزۋ، ولاردى تۇسىنۋگە بولادى.
"الايدا، جاڭا مەكتەپ، جاتاقحانا، اۋرۋحانا، كىتاپحانا، مۇراجاي نەمەسە سپورت سارايىن تۇرعىزۋ الدەقايدا ماڭىزدىراق. مۇنىڭ ساۋابى مول. كەيىنگى ۇرپاق تا وسىنداي يگى ىستەرگە العىس ايتارى انىق.
بيزنەس وكىلدەرى بارلىق سالادا بەلسەندى بولۋى قاجەت. مۇقتاج جاندارعا قولىنان كەلگەنشە كومەك كورسەتىپ، ءاردايىم الەۋمەتتىك جاۋاپكەرشىلىك تانىتۋى كەرەك. سوندا عانا، شىن مانىندە، جاڭا ۇلتتىق بۋرجۋازيا قالىپتاسادى دەپ ايتا الامىز"، - دەدى پرەزيدەنت.
ءدال وسىنداي ۇلتتىق بۋرجۋازيا وكىلدەرى باسەكەگە قابىلەتتى ەكونوميكا قۇرۋعا جانە حالقىنا قالتقىسىز قىزمەت ەتۋگە قاشاندا دايىن بولادى.
