Meditsina qyzmetkerlerine kúsh qoldanǵandarǵa qatysty qatań jaza engiziledi. Bul týraly Densaýlyq saqtaý ministri Aqmaral Álnazarova málimdedi, dep habarlaidy Dalanews.kz.
Ministrdiń aitýynsha, Memleket basshysynyń tapsyrmasymen Qylmystyq kodekske jańa ózgerister engizilmek. Meditsina qyzmetkerlerine kúsh qoldaný, qorqytý jaǵdailaryn jeke bappen qarastyratyn 158-1-bap ázirlenip jatyr.
"Men eńbek jolymdy medbike, keiin qabyldaý bóliminiń dárigeri retinde bastaǵanmyn. Buryn mundai oqiǵalar múlde kezdespeitin. Qazir mundai shabýyldar ai saiyn tirkelip otyr. Bul jaǵdaidyń kúrdelene túskeniniń belgisi", – dedi Álnazarova.
Jańa zań jobasyna sáikes:
Eger meditsinalyq qyzmetkerge kúsh qoldanamyn dep qorqytsa — 2 jylǵa deiin bas bostandyǵyn shekteý jazasy qarastyrylady;
Eger naqty kúsh qoldansa — 2 jyldan 7 jylǵa deiin bas bostandyǵynan aiyrý jazasy taǵaiyndalady;
Eger bul áreket tótenshe jaǵdai kezinde jasalsa — 10 jylǵa deiin,
Al birneshe adam tarapynan bir nemese birneshe meditsina qyzmetkerine kúsh qoldanylsa — 15 jylǵa deiin bas bostandyǵynan aiyrý kózdelgen.
Álnazarovanyń aitýynsha, bul ózgerister qyrkúiek aiynda Parlament qaraýyna usynylady.
Máselege bailanysty Premer-ministrdiń orynbasary Ermek Kósherbaev ta pikir bildirip, tek meditsina qyzmetkerleri ǵana emes, áleýmettik sala mamandaryn da qorǵaý qajet ekenin atap ótti.
"Muǵalimderge, áleýmettik qyzmetkerlerge de shabýyl jiilep ketti. Kóbi halyqtyń ashýyn solardan alady. Bul — tárbie men mádeniet máselesi. Aldaǵy ýaqytta basqa salalardaǵy mamandardy da quqyqtyq qorǵaý tetikterin qarastyramyz", – dedi Kósherbaev.
