مەديسينا قىزمەتكەرلەرىنە كۇش قولدانعاندارعا قاتىستى قاتاڭ جازا ەنگىزىلەدى. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، مەملەكەت باسشىسىنىڭ تاپسىرماسىمەن قىلمىستىق كودەكسكە جاڭا وزگەرىستەر ەنگىزىلمەك. مەديسينا قىزمەتكەرلەرىنە كۇش قولدانۋ، قورقىتۋ جاعدايلارىن جەكە باپپەن قاراستىراتىن 158-1-باپ ازىرلەنىپ جاتىر.
"مەن ەڭبەك جولىمدى مەدبيكە، كەيىن قابىلداۋ ءبولىمىنىڭ دارىگەرى رەتىندە باستاعانمىن. بۇرىن مۇنداي وقيعالار مۇلدە كەزدەسپەيتىن. ءقازىر مۇنداي شابۋىلدار اي سايىن تىركەلىپ وتىر. بۇل جاعدايدىڭ كۇردەلەنە تۇسكەنىنىڭ بەلگىسى"، – دەدى ءالنازاروۆا.
جاڭا زاڭ جوباسىنا سايكەس:
ەگەر مەديسينالىق قىزمەتكەرگە كۇش قولدانامىن دەپ قورقىتسا — 2 جىلعا دەيىن باس بوستاندىعىن شەكتەۋ جازاسى قاراستىرىلادى؛
ەگەر ناقتى كۇش قولدانسا — 2 جىلدان 7 جىلعا دەيىن باس بوستاندىعىنان ايىرۋ جازاسى تاعايىندالادى؛
ەگەر بۇل ارەكەت توتەنشە جاعداي كەزىندە جاسالسا — 10 جىلعا دەيىن،
ال بىرنەشە ادام تاراپىنان ءبىر نەمەسە بىرنەشە مەديسينا قىزمەتكەرىنە كۇش قولدانىلسا — 15 جىلعا دەيىن باس بوستاندىعىنان ايىرۋ كوزدەلگەن.
ءالنازاروۆانىڭ ايتۋىنشا، بۇل وزگەرىستەر قىركۇيەك ايىندا پارلامەنت قاراۋىنا ۇسىنىلادى.
ماسەلەگە بايلانىستى پرەمەر-مينيستردىڭ ورىنباسارى ەرمەك كوشەربايەۆ تا پىكىر ءبىلدىرىپ، تەك مەديسينا قىزمەتكەرلەرى عانا ەمەس، الەۋمەتتىك سالا ماماندارىن دا قورعاۋ قاجەت ەكەنىن اتاپ ءوتتى.
"مۇعالىمدەرگە، الەۋمەتتىك قىزمەتكەرلەرگە دە شابۋىل جيىلەپ كەتتى. كوبى حالىقتىڭ اشۋىن سولاردان الادى. بۇل — تاربيە مەن مادەنيەت ماسەلەسى. الداعى ۋاقىتتا باسقا سالالارداعى مامانداردى دا قۇقىقتىق قورعاۋ تەتىكتەرىن قاراستىرامىز"، – دەدى كوشەربايەۆ.
