Qazaqstanda óner adamdarynyń saiasatqa kelýi táýelsizdiktiń alǵashqy jyldarynan bastaý aldy. Ánshiler, akterler, aityskerler men mádeniet qairatkerleri ár jyldary halyq qalaýlysy atanyp, shyǵarmashylyq joldaryn memlekettik qyzmetpen ushtastyrýǵa umtyldy. Biri ondaǵan jyl depýtat bolyp zań shyǵarý isine aralassa, endi biri Parlamentte qysqa ýaqyt qyzmet etti. Dalanews.kz redaktsiiasy sahnadan saiasatqa kelgen tanymal tulǵalardyń birqataryna sholý jasady.
Qudaibergen Sultanbaev
Bul úrdistiń kóshinde “Tamasha” oiyn-saýyq teatry arqyly milliondardyń yqylasyna bólengen Qazaqstannyń halyq ártisi, marqum Qudaibergen Sultanbaev tur. Ol 1999-2004 jyldary II shaqyrylym Májilisiniń depýtaty bolyp sailanǵanda, kópshilik úshin bul tosyn jańalyq edi. Alaida akter óziniń týma talanty men tapqyrlyǵyn saiasatta da kórsete bildi. Qudaibergen Sultanbaevtyń depýtattyq qyzmetine bailanysty el jadynda saqtalǵan qyzyq estelik bar. Bir kúni Parlament dálizinde eks-prezident Nursultan Nazarbaev akterdiń hal-jaǵdaiyn suraǵannan keiin: “Parlamentte ózińnen basqa neshe ártis bar?” dep ázildeidi. Sonda Sultanbaev ile-shala: “Pralamentte 130 ártis barmyz, biraq onyń ishindegi kásibi ártisi - menmin” dep jaýap bergen eken.
Bekbolat Tileýhan
Ónerden saiasatqa kelgen tulǵalardyń ishinde ánshi, termeshi Bekbolat Tileýhannyń depýtattyq ótili uzaq jyldarǵa jalǵasty. Memlekettik qyzmetke kelmes buryn ol Qurmanǵazy atyndaǵy Almaty memlekettik konservatoriiasynda oqytýshy, dotsent jáne kafedra meńgerýshisi boldy. Keiin Prezident orkestriniń kórkemdik jetekshisi qyzmetin atqaryp, 2001–2004 jyldary Mádeniet komitetiniń tóraǵasy, odan soń Mádeniet ministriniń vitse-ministri laýazymynda eńbek etti. 2004 jyly III shaqyrylym Májilisiniń depýtaty bolyp sailanǵan Bekbolat Tileýhan keiin IV shaqyrylymda (2007–2011) jáne VI shaqyrylymda (2016–2021) da depýtat bolyp, 17 jylǵa jýyq Májilis minberinde júrdi. 2021 jyldyń jeltoqsanynda depýtattyq ókilettigin óz ótinishimen toqtatyp, Dúniejúzilik etnosport konfederatsiiasynyń basshylyq quramyndaǵy qyzmetine aýysty.
Nurlan Ónerbaev
“Ana týraly jyr” ánimen halyqtyń júreginen oryn alǵan Qazaqstannyń eńbek sińirgen qairatkeri Nurlan Ónerbaev ta shyǵarmashylyqtan saiasatqa kelgen tulǵalardyń biri. Ol eńbek jolyn teatr akteri retinde bastap, keiin estradaǵa bet buryp, qazaq án óneriniń tanymal ókilderiniń birine ainaldy. Memlekettik qyzmette de tájiribe jinaǵan óner iesi ár jyldary “Habar” agenttiginde, Qazaqstan Prezidenti orkestrinde, sondai-aq Almaty qalalyq Mádeniet basqarmasynyń basshysy qyzmetterin atqardy. 2008 jyly IV shaqyrylym Májilisiniń depýtaty bolyp sailanyp, mádeniet, aqparat jáne áleýmettik máselelerge qatysty zań jobalaryn qaraýǵa qatysty. 2021 jyly VII shaqyrylym Májilisiniń depýtaty retinde Parlamentke qaita keldi.
Nurlan Álimjanov
Akter ári ánshi Nurlan Álimjanov 2019 jyldyń qyrkúieginde VII shaqyrylymdaǵy Májilis depýtaty retinde ant qabyldady. Ol ónerdegi jolyn teatr sahnasynan bastap, keiin kino men estradada keńinen tanyldy. Álimjanov kópshilikke eń aldymen “Elbasy joly” kinoepopeiasynda, sondai-aq “Balalyq shaǵymnyń aspany” jáne “Tyǵyryqtan jol tapqan” filmderinde Nursultan Nazarbaevtyń jastyq shaǵyn somdaǵan akter retinde belgili boldy. Bul rólder oǵan keń tanymaldyq ákelip, 2013 jyly “Qazaqstannyń eńbek sińirgen qairatkeri” ataǵyn alýyna da yqpal etti.
Depýtattyq mandat alǵannan keiin de shyǵarmashylyqtan qol úzbeitinin aityp, án jazýdy jáne teatr sahnasyndaǵy jumysyn jalǵastyratynyn málimdegen edi. Keiin Májilistegi qyzmetinen soń Astananyń Mádeniet basqarmasyn basqardy.
Amanjol Áltai
Aitysker aqyn, filologiia ǵylymdarynyń doktory, Qazaqstannyń eńbek sińirgen qairatkeri Amanjol Áltai da saiasatta tóbe kórsetti. Ol uzaq jyldar boiy respýblikalyq jáne halyqaralyq aitystarda top jaryp, ulttyq rýhaniiat, til men tarih taqyrybyn kótergen aqyn retinde tanyldy. Sonymen qatar L.N. Gýmilev atyndaǵy Eýraziia ulttyq ýniversitetinde oqytýshy, keiin professor bolyp eńbek etip, qazaq ádebieti men aitys ónerine arnalǵan ǵylymi eńbekter jariialady.
2022 jyldyń naýryzynda Amanat partiiasynyń partiialyq tizimi boiynsha VII shaqyrylym Májilisiniń depýtaty bolyp sailanyp, Parlamenttiń Áleýmettik-mádeni damý komitetiniń quramyna endi. Al 2023 jylǵy kezekten tys parlamenttik sailaýdan keiin VIII shaqyrylym Májilisiniń depýtaty retinde jumysyn jalǵastyrdy.
Rinat Zaiytov
Aitysker aqyn, Qazaqstannyń eńbek sińirgen qairatkeri Rinat Zaiytov 2023 jylǵy 19 naýryzda ótken kezekten tys parlamenttik sailaýda Astana qalasyndaǵy №1 birmandatty sailaý okrýginen jeńiske jetip, VIII shaqyrylym Májilisiniń depýtaty atandy. Buǵan deiin ol uzaq jyldar boiy aitys sahnasynda ulttyq til, rýhaniiat, tarihi sana men qoǵamdaǵy ózekti máselelerdi kóterip kelgen.
Saiasatqa kelgen tanymal azamattar munymen shektelmeidi. Óner maitalmandarynan bólek, sportshylar da halyq senimine ie bolyp, Parlament qabyrǵasynda qyzmet atqaryp keledi. Endeshe kelesi bólimde depýtat bolǵan sport sańlaqtaryna sholý jasaimyz.
